2010 жылдың 6 мамырында сағат 11.00-де Қазақстан Республикасының Ұлттық кітапханасында «Великие битвы Великой Отечественной войны» атты кітаптың тұсаукесері өтті. Кітап авторлары – Мұхтар Назарбаев және Валерий Слиденко.
«Великие битвы Великой Отечественной войны» кітабы Кеңес халқының Ұлы Отан соғысында фашистік Германия мен оның одақтастарын жеңуінің 65 жылдығына арналады.
Кітап Ұлы Отан соғысына қатысушыларға, майданда, тылда және партизан қозғалысында ерлік көрсеткендерге, ұлы Жеңістің маршалдарына, генералдарына, адмиралдарына, офицерлері мен жауынгерлеріне, матростарына, сондай-ақ тылдағы еңбеккерлердің Жеңіске қосқан үлесіне арналған.
Алматы қаласының және Қазақстан Республикасының «Боевое братство» одағы Ұлттық кітапханаға аталмыш басылымның 150 данасын тарту етті.
Осыдан екі жыл бұрын кітапханаға Ауған соғысына қатысушылар 1979-1989 жылдар аралығында Ауған соғысында қаза тапқан, тағдырлары Алматы қаласымен және Алматы облысымен азды-көпті байланысты болған 117 жауынгерге арналған «О павших в Афганистане» атты кітапты сыйға тартқан болатын. |