Қазақстан Республикасының Ұлттық кітапханасында «Менің әкем – Абайділда Сыздықұлы Дәулетбаев» деп аталатын кітаптың тұсаукесері өтті. Кітап «Өндіріс генералы» атанған Абайділда Дәулетбаев туралы.

Ол Ташкенттегі Орта Азия политехникалық институтының түлегі, инженер. Еңбек жолын Қызылордадағы машина жөндеу зауытында қарапайым жұмысшы болып бастаған Абайділда Дәулетбаев табандылығымен танылып, еңбекқорлығымен елге үлгі болған азамат. Сыр өңіріндегі екі бірдей зауытты басқарып қана қоймай, сол өндіріс орындарының материалдық-техникалық базасын жаңартып, жұмысшыларының әлеуметтік-тұрмыстық жағдайын да жақсарта білген басшы.

Оның Жатка машинасын модернизациялау жолында рационализаторлық жаңалықтар ашқаны үшін КСРО Ғылым және техника жөніндегі мемлекеттік Комитеті жанындағы Өнертапқыштық пен жаңалықтар ашу жөніндегі мемлекеттік комитеті берген бірнеше авторлық күәліктері бар.

Ол басқарған зауытта кезінде ел басшылары Д.А.Қонаев, Н.Ә.Назарбаевтар болып,  оның жұмысын лайықты бағалаған.

А.Дәулетбаев «Құрмет» орденімен, көптеген медальдармен және Құрмет грамоталарымен марапатталған.

Тұсаукесерге оның ізбасарлары, достары мен туған-туысқандары қатысты.