2010 жылы 9 шілде Қазақстан Республикасының Ұлттық кітапханасы Түркі халықтарының мәдениетін қолдау қоғамдық ұйымымен (ТҮРКСОЙ) бірлесіп Күнімжан Байқадамованың «Байқадамовтар әулеті» атты кітабының тұсаукесерін өткізді.
     «Байқадамовтар әулеті» атты кітапта кешегі кеңес заманының кереғар саясаты тұсында нақақтан зардап шегіп, қуғын-сүргінге ұшыраған Алаш ардақтыларының бірі – Байқадам Қаралдиннің өмірі  мен ұрпақтары жайында жазылған. Автор Күнімжан Байқадамова тәуелсіздік тұсында жарық көрген материалдарды негізге ала отырып, жадында қалған естеліктерді жинақтап, арманда кеткен аяулы әке, апасы-Данабике, ағасы- Бақытжан, сіңлісі-Айсұлу туралы сыр шертіп, осы отбасының әулеттік шежіресін жасаған.
    Тұсаукесерге кітаптың авторы профессор Күнімжан Байқадамова, Түркі халықтарының мәдениетін қолдау қоғамдық ұйымының (ТҮРКСОЙ) төрағасы Д.Қ.Қасейінов, Мемлекеттік сыйлықтың иегері,театр сыншысы Ә.Сығай, Орталық мемлекеттік мұражай директоры Н.Әлімбай, белгілі жазушы С.Әсіпов және Байқадам Қаралдиннің ұрпақтары қатысты.