10 желтоқсанда ҚР Ұлттық кітапханасы, ҚР Жоғары оқу орындары, Алматы қалалық ардагерлер кеңесі және «Генералдар Одағы» республикалық қоғамдық бірлестігі Ұлттық кітапхананың конференц залында «Қазақтың Ұлы қолбасшылары» атты республикалық ғылыми-тәжірибелік конференция өткізді.

   Конференцияның негізгі мақсаты – қазақтың қолбасшылық өнерін кеңінен таныстыру, қазақ батырларының ерен ерлігін ұлықтау, жастарды отан сүйгіштікке, батылдық рухта тәрбиелеуге  үлес қосу.

  Конференцияны Қазақстан Республикасының Жоғарғы оқу орындары қауымдастығының президенті, экономика ғылымдарының докторы, профессор Р. Алшанов, Республикалық қоғамдық бірлестік «Генералдар кеңесінің» төрағасы, әділет генерал-майоры Р.Қайдаров, Қазақстан Республикасының тұңғыш ғарышкері, Халық қаһарманы, авиация генералы Т. Әубәкіров құттықтау сөзбен ашты.

   Конференцияда қазақ қолбасшылары жайлы баяндама жасалды және «Алғадай» батыр қолбасшы, батыр генерал» атты батыр болған қазақтың ержүрек ұлдары жайындағы кітаптың тұсаукесері өтті.

   Конференцияға Қазақстан Републикасының Қорғаныс министрлігі, ҚР Әскери институттарының басшылығы мен курсанттары, Б. Момышұлы атындағы Алматы Республикалық әскери мектеп, ҚР жоғары оқу орындарының басшылары, профессор-оқытушылары мен студенттері, Алматы қалалық ардагерлер кеңесі, Халық қаһарманы Б.Ертаев, Б.Баекенов, А.Абрахманов, А.Есенқұлов,  ҚР  Республикалық ұлан қолбасшысы, генерал-лейтенант А.Тасболатов т.б. барлығы 300-ге жуық адам қатысты.