2011 жылы 5 желтоқсанда Қазақстан Республикасының Ұлттық кітапханасында белгілі ақын, сазгер Қасым Аманжоловтың 100 жылдық мерейтойына арналған «Өлмес өмір жыршысы» атты кітап көрмесі ашылды.
Көрме негізгі екі бөлімнен құралған.
«Қыран қанатты ақын» бөлімінде Қасым Аманжоловтың «Өмір сыры», «Дауыл», «Балбөбек», «Нұрлы дүние», «Жанна» атты өлең жинақтары мен «Ақын өлімі туралы аңыз» поэмасы қойылды. Сонымен қатар, жазушының орыс классиктері А.С.Пушкин, М.Ю.Лермонтов, Н.А.Некрасовтың және т.б. ақындардың өлеңдерін қазақ тіліне аударған аудармалары көрмеден орын алды.
«Дауыл мен оттан жаралған» бөлімінде Әбділдә Тәжібаевтың, Ғафу Қайырбековтың, Мұхамеджан Қаратаевтың, Мұзафар Әлімбаевтың, Серік Қирабаевтың, Сәбит Досановтың және көптеген басқа да ақын-жазушылардың Қасым Аманжоловтың шығармашылығы туралы мақалалары мен арнаулары оқырман назарына ұсынылды.
Қасым Аманжолов (1911-1955) – қазақ ақыны. Ұлы Отан соғысына қатысушы. 1931-41 жылдары республикалық «Лениншіл жас», Орал облыстық «Екпінді құрылыс» газеттерінің редакцияларында, сол өңірдің театрында жұмыс істеген. 1946 жылдан бастап бірнеше жыл «Әдебиет және өнер» журналының поэзия бөлімінің меңгерушісі қызметін атқарған. |