2011 жылы 12 желтоқсанда сағат 11.00-де ҚР Ұлттық кітапханасында «Атамұра» баспа корпорациясында жарық көрген «Мұхтар Әуезов» энциклопедиясының тұсаукесері өтті.
Сонымен қатар, Кәдірбек Сегізбайұлының «Қазақы дастарқан» атты кітап-альбомы да ұсынылды.
Тұсаукесер рәсімін ҚР ҰК Бас директоры Г.Қ.Балабекова ашты.
Тұсаукесерді «Атамұра» корпорациясы» ЖШС-нің президенті Р.А. Құл-Мұхаммед жүргізді. Тұсаукесер рәсімінде белгілі ғалым, филология ғылымдарының докторы, профессор М.Мырзахметов, филология ғылымдарының докторы, профессор, академик Т.Кәкішев, жазушы, ғалым Т.Ибрагимов, мәдениеттанушы-ғалым, дипломат, «Мұхтар Әуезов қоры» Қоғамдық қорының президенті М.Әуезов, қоғам қайраткері, филология ғылымдарының докторы, профессор Ш.Елеукенов, Қазақстан Жазушылар одағы басқармасының төрағасы, ақын, драматург Н.Оразалин және басқа да көптеген белгілі жазушылар мен ғалымдар, мәдениет қайраткерлері өз ойларымен бөлісіп, сөз сөйледі.
Іс-шараның аясында ҚР Ұлттық кітапханасының қорынан «Атамұра» корпорациясынан жарық көрген кітаптардың безендірілген көрмесі ұсынылды. |
