20 наурызда ҚР Ұлттық кітапханасында «Қазақстандағы авторлық құқық» тақырыбында лекция өткізілді. Лекция кітапхана қызметкерлерін авторлық құқық саласындағы ұлттық заңнамамен таныстыру мақсатымен өткізілді, өйткені, электрондық қорды қалыптастыруға байланысты авторлық құқық өзекті мәселеге айналып отыр. Лекцияны «Абырой» авторлық қоғамының авторлық кеңесінің Төрағасы, «Камертон» журналының баспагері, заң ғылымдарының кандидаты Төлегенов Темірлан оқыды. Лектор авторлық-құқықтық қатынастарды реттейтін негізгі нормативті акт Қазақстан Республикасының «Авторлық құқық және сабақтас құқықтар туралы» 1996 жылғы 10 маусымдағы №6-I (10.07.2009 ж. өзгерістер мен толықтырулар енгізілген) Заңы болып табылатынын түсіндірді. Шара өткізілу барысында Т.Төлегенов электрондық кітапханалардың қызметінде авторлық құқықтардың сақталуы жайлы сұрақтарға жауап берді.

   Сонымен қатар, лектор «Қазақстан Республикасының кейбір заңнамалық актілеріне зияткерлік меншік мәселелері бойынша өзгерістер мен толықтырулар енгізу туралы» 2012 жылғы 12 қаңтардағы  №537-IV ҚР Заң жобасына  енгізілген өзгерістер жайлы хабардар етті. Енгізілген өзгерістерге сәйкес,  электрондық цифрлық форматтағы туындылардың және (немесе) сабақтас құқықтар объектілерінің даналарын алмастыруға, сақтауға, тасымалдауға одан әрі қол жеткізу үшін интернет-ресурстарды ұйымдастыру, құру арқылы елеулі залал келтірген авторлық құқық және (немесе) сабақтас құқықтар объектілерін заңсыз пайдалануды шектеу жауапкершілігі алдын-ала ескерілген.