2012 жылы 5 сәуірде сағат 11.00-де Қазақстан Республикасының Ұлттық кітапханасында Әбсаттар қажы Дербісәлінің бастамасымен жарық көрген «Мирза Мухаммад Хайдар Дуглат в персидских источниках» және «Хибатулла ат-Тарази и его духовное наследие» атты кітаптарының тұсаукесер рәсімі өтті.
Шараны Қазақстан Мұсылман Діни басқармасының баспасөз хатшысы Ағабек Сыздықұлы жүргізді.
Шарада Бас мүфтидің орынбасары, шейх Мұхаммед Хусейн Алсабеков баяндама жасап, Қазақстан Мұсылман Діни басқармасының аппарат басшысы Балғабек Әбдіқайымұлы Мырзаев, теология ғылымдарының докторы Мұхитдин Исаұлы бұл еңбектер туралы ойларын ортаға салды. Ұлттық кітапхананың қорына сыйға тартылған ғылыми еңбектер жайлы ғалымдар да өз пікірлерін білдірді. Бұл еңбектер қазақстандық білікті шығыстанушы, дінтанушы, әдебиет зерттеуші, ғалым, жазушы, филология ғылымдарының докторы, Қазақстанның Бас мүфтиі шейх Әбсаттар қажы Дербісәлінің көп жылдар бойы жүргізген зерттеуінің нәтижесі.
ҚР Ұлттық кітапхананың Сирек кітаптар мен қолжазбалар қорының жетекшісі Н.М. Асқарбекова сирек кітаптар қоры туралы мәлімет беріп, болашақта Шығыс халқының тарихи-мәдени мұраларын зерттеуге, анықтауға жас ғалымдарды шақырды.
Тұсаукесерге Алматы қаласы мешіттерінің Бас имамдары мен белгілі ғалымдар, «Нур-Мубарак» Ислам университетінің студенттері, республикалық, жоғары оқу орындарының кітапханашылары мен оқырмандары қатысты.
Іс-шараның аясында ҚР Ұлттық кітапханасының қорынан Ә.Дербісәлінің шығармашылығына арналған «Ұстаз. Ғалым. Қайраткер» атты кітап көрмесінің басылымдары оқырмандардың сұранысына ие болды.
Бұл жаңа басылымдар Алматы қаласының кітапханаларына сыйға тартылды.
|