Камал Смайылов Сейітжанұлы (1932-2003) Қарағанды облысы Ұлытау ауданының Сарлық ауылында дүниеге келген. 1954 жылы С.М.Киров атындағы ҚазМУ-нің (қазіргі әл-Фараби атындағы ҚазҰУ) филология факультетінің журналистика бөлімін бітірген. Еңбек жолын «Лениншіл жас» (қазіргі «Жас Алаш») газетінің Қарағанды облысындағы меншікті тілшісі болып журналистік қызметтен бастаған.

   К.Смайылов республиканың қоғамдық-саяси өмірінің дамуына елеулі үлес қосты: Қазақстан ЛКСМ Орталық Комитетінің хатшысы (1962-1964), «Қазақфильм» киностудиясының директоры (1965-1971), Қазақ КСР Кинематография жөніндегі мемлекеттік комитетінің төрағасы (1973-1977),  Қазақ КСР Министрлер Кеңесі мәдениет бөлімінің меңгерушісі (1977-1980), Қазақстан журналистер Одағының төрағасы (1990-2001),  Қазақстан журналистер Одағы Кеңесінің төрағасы (2001-2003) т.б. қызметтерін атқарды. Қазақ КСР Жоғарғы Кеңесінің депутаты (Қазақстан Журналистер одағынан, 1991) болып сайланған.

   Қазақстан Республикасының еңбек сіңірген қайраткері, екі рет «Құрмет Белгісі» орденімен және «Алтын адам» белгісімен марапатталған (2001).

   К.Смайыловтың шығармашылық қызметі Қазақстанның тәуелсіздігінің қалыптасуы мен нығаюына байланысты тарихи оқиғаларға, ядролық полигон мәселелері мен космонавтикаға, сондай-ақ Қазақстанның кино өнері мен телевидениесінің дамуына арналған.

  Кітап көрмесі екі бөлімнен: жазушының өмірі мен шығармашылығынан  тұрады. Көрмеде К.Смайыловтың еңбектері: «Сенің бақытың» (1960), «Жолданбаған 27 хат» (1992), «Елім саған айтам, ел басы, сен тыңда!» (1998), «Жеті қыр бір сыр» (2000), үш томдық шығармалар жинағы (2003-2004) т.б. ұсынылған.