«Қазақстан кітаптары» бөлімінде жазушы Дүйсенбек Әділдің 70 жылдық мерейтойына арналған кітап көрмесі ұйымдастырылды.
Дүйсенбек Әділ 1942 жылы 24 мамырда Жамбыл қаласының (қазіргі Тараз қаласы) жанындағы Жас өркен ауылында туған. 1969 жылы С.М. Киров атындағы Қазақ Мемлекеттік университетінің филология факультетін бітірген. Еңбек жолын республикалық «Социалистік Қазақстан» (қазіргі «Егеменді Қазақстан») газетінде кіші әдеби қызметкер қызметінен бастаған. Содан бері үзіліссіз осы басылымда еңбек етті. Бөлім меңгерушісі, редакция алқасының мүшесі болған. Қазіргі уақытта Қазақстан Республикасы Президентінің Баспасөз қызметінде редактор қызметін атқарады.
Дүйсенбек Әділ С.Ходжанов атындағы сыйлықтың лауреаты (1995). Қазақ ССР Жоғарғы Кеңесінің грамотасымен (1987), «Еңбек ардагері» (1988), «Қазақстан Республикасының Тәуелсіздігіне 10 жыл» (2002), «Ерен еңбегі үшін» (2002) медальдарымен марапатталған.
Кітап көрмесі жазушының өмірі мен шығармашылығынан тұрады. Көрмеде жазушының «Ақ күмбез» (1977), «Көкжиек» (1979, 2002), «Жүрек жылуы» (1984), «Менің Шер ағам» (2002), «Қара шаңырақ» (2004), «Шерағамның шеруі» (2007), т.б. еңбектері мен мақалалары ұсынылған. |