«Қазақстан кітаптары» бөлімінде жазушы, ақын, аудармашы, сыншы Қуанышбай Құрманғалидың 70 жылдық мерейтойына арналған «Қоңыр күз күмбірі» атты кітап көрмесі ұйымдастырылды.

Қуанышбай Құрманғали 1942 жылы 1 маусымда Қостанай облысында туған. 1969 жылы С.М. Киров атындағы Қазақ мемлекеттік университетін бітірген. 1960 -1976 жылдар аралығында «Лениншіл жас»  (қазіргі «Жас Алаш») газетінде корректор, әдеби қызметкер, бөлім меңгерушісі, 1976-1989 жылдары «Қазақстан коммунисі» (қазіргі «Ақиқат») журналында аға редактор,  жауапты хатшы, бас редактордың орынбасары, 1978-1986 және 1990-1994 жж. «Жалын» баспасында бөлім меңгерушісі, бас редактордың орынбасары, бас редактор, 1986-1988 жылдары Қазақ Совет энциклопедиясының бас редакциясында бөлім меңгерушісі, 1995-1996 жылдары Дүние жүзі қазақтары қауымдастығында бас маман және «Ел» баспасының бас редакторы, Қазақ білім академиясының вице-президенті – Республикалық баспа кабинетінің директоры, «Ғылым» ғылыми баспа орталығының бас директоры қызметтерін атқарған.

   Кітап көрмесі жазушының өмірі мен шығармашылығын қамтиды. Көрмеге жазушының «Арман аралы» (1981), «Қош, қалқатай» (1990), «Қоңыр күз күмбірі» (2002), «Әдебиет әлеміне саяхат» (2012), атты шығармалары, сонымен қатар шетелдік және орыс жазушыларының шығармаларының аудармалары: И Б.Шубиннің «Доктор Чехов» (1979), Ю.Балтушистің «Өмір өткелдері» (1986), «Орыс халық ертегілері» (1990), И.Стрелкованың «Шоқан Уәлиханов»(2008), «Базарлық» (2009), Г.Флобердің «Бовари ханым. Бувар мен Пекюше»(2010), қойылған.