Мерзімді басылымдар бөлімінде «Қостанай таңы» газетінің 90 жылдығына арналған көрме ашылды.
«Қостанай таңы» – Қостанай облысының қоғамдық – саяси газеті. Газеттің бірінші саны 1922 жылы 25 маусымда «Ауыл» деген атпен шықты. РКП(б) Қостанай губерниялық комитетінің органы ретінде құрылды. Газеттің алғашқы ұйымдастырушы, әрі редакторы – Мұхаметжан Сералин, жауапты шығарушысы - қазақ әдебиетінің классигі Бейімбет Майлин болды. Кейін «Социалды ауыл» (1931–1936), «Большевиктік жол» (1936–1953), «Коммунизм жолы» (1953–1963), «Коммунизм таңы» (1966–1991) деген атаулармен шықты.
1991 жылдан «Қостанай таңы» газеті аптасына 3 рет Қостанай облысы әкімнің қолдауымен шығарылады. Бас редакторы – Жайберген Болатов. Осы жылдар ішінде астықты өлкенің тарихы мен мәдениеті, әдебиеті мен өнері басылымның шежірелі беттеріне айналды. Еліміздегі әлеуметтік-экономикалық құқықтық реформаларды оқырмандарға жан-жақты насихаттауда газеттің қосқан үлесі зор. |