ҚР Ұлттық кітапханасында «Астана 2012 - түркі әлемінің мәдени астанасы» жылына орай «Астана – түркі әлемінің Мәдени астанасы» атты кітап көрмесі ашылды.
Кітап көрмесінің мақсаты - түркітілдес халықтардың тарихи-мәдени мұрасы және мәдениеті мен өнерінің қазіргі жетістіктері туралы ҚР Ұлттық кітапхана қорындағы басылымдарды насихаттау; халықтардың ұлттық тарихын, әдебиеті, мәдениеті мен өнерін, дәстүрлерін оқып-зерделеуге атсалысу.
Көрмеде қазақ және түркі халықтары тілдеріндегі 2000-нан астам басылымдар ұсынылған. Көрме төрт кең ауқымды бөлімнен тұрады:
«Астана – түркі әлемінің Мәдени астанасы» атты бірінші бөлімде Қазақстан Республикасының Тұңғыш Президенті Н. Назарбаевтың еңбектері, баяндамалары мен сөздері, жолдаулары мен үндеулері, сұхбаттары мен мақалалары, құттықтаулары қойылған. Олардың ішінде әр жылдары жарық көрген «Әділеттің ақ жолы», «Тәуелсіздігімізге бес жыл», «Ғасырлар тоғысында», «Тарих толқынында», «Еуразия жүрегінде», «Қазақстан жолы», «Сындарлы он жыл» және т.б. кітаптары бар. Сонымен қатар, Астана қаласының тарихы, бүгіні мен болашағы, Тәуелсіздігіміздің символы ретінде дамып, өркендеуі туралы әдебиеттер ұсынылған.
«Ұлы дала Мәдениеті» бөлімі бүкіл түркі әлемінің тарихы мен мәдениетіне, ТҮРКСОЙ – Халықаралық түркі мәдени дүниесін біріктірген ұйымға, оның тарихы мен қызметіне арналған.
«Түркітілдес мемлекеттердің дамуы және жаңа белестері. Өнері мен мәдениеті» атты бөлімде Қазақстан, Түркия, Әзірбайжан, Қырғызстан, Түркіменстан, Өзбекстан, Башқұртстан, Татарстан, Солтүстік Кипр Түрік Республикасы, Ғағауыз, Хақас Автономиялық, Алтай, Тыуа, Саха Республикаларының мәдениеті мен өнері туралы басылымдар ұсынылған.
«Алматы қаласында 2012 жыл - Мәдениетті қолдау жылы» бөлімінде Алматы қаласының тарихы мен мәдениеті туралы басылымдар, соның ішінде - энциклопедиялар, альбомдар, кітаптар ұсынылған.
Кітап көрмесін көруге шақырамыз!
 
|
