2012 жылы 25 қазан, сағ.11.00-де ҚР Ұлттық кітапханасының Кітапханатану залында филология ғылымдарының докторы, профессор Виктор Бадиковтың «По Гамбургскому счету», «Книга про себя и про всех. Творчество. Жизнь. Голоса друзей» кітаптарының және белгілі телережиссер, сценарист, продюсер Рита Жугунусованың «Виктор Бадиков. Я считаю себя человеком литературы» атты кинофильмінің тұсаукесерлері өтті.
Ұйымдастырушылар: ҚР Ұлттық кітапханасы, белгілі ақын, прозаик, журналист Римма Артемьева.
Тұсаукесерді белгілі ақын прозаик, журналист, ҚР Журналистер одағының мүшесі Римма Артемьева жүргізді.
Виктор Владимирович Бадиков (1939-2008жж.) - филология ғылымдарының докторы, профессор, Жазушылар одағының, ПЕН-клубтың мүшесі, Қазақстанның жетекші әдебиеттанушыларының, сыншыларының бірі, ұстаз, орыс әдебиеті оқулықтарының және монографиялардың авторы.
В.Бадиковтың қаламынан туған орыс әдебиетінің көркем сөз шеберлері Ю.Олеша, А.Платонов, М.Булгаков, Е.Замятин, Б.Пильняк, қазақтың ірі тұлғалары М.Әуезов, Ж.Аймауытов, А.Нұрпейісов, Ә.Тарази, О.Сүлейменов, О.Бөкей, М.Симашко, Г.Бельгер және қазіргі әдебиет майталмандары Д.Исабеков, Р.Сейсенбаев, Б.Канапьянов, Д.Досжан, Б.Қайырбеков, Д.Нақыповтың шығармашылықтары туралы зерттеулері, талдаулары, эсселері мен монографиялары әдебиет саласында ерекше орын алады. Оның «Қазақ әдебиетінің тарихы» атты іргелі еңбегінде орыстілді қазақ жазушыларының шығармашылықтары жан-жақты зерттелген. Жазушының әдеби шығармашылығы, ғылыми, педагогикалық қызметі қазақстандық әдебиет пен әдебиеттануда қайталанбас із қалдырды. В.Бадиков 40 жылдан астам республикамыздың жетекші жоғары оқу орындарында - Абай атындағы Қазақ Ұлттық педагогикалық университетінде, әл-Фараби атындағы Қазақ Ұлттық университетінде, Қарағанды, Ақтөбе, Қостанай, Ақтау, Оңтүстік және Шығыс Қазақстан университеттерінде қызмет еткен. В.Бадиковтың еңбектері еліміздің мәдени мұрасының бөленбес бір бөлігі болып табылады.
«По Гамбургскому счету», «Книга про себя и про всех. Творчество. Жизнь. Голоса друзей» кітаптары В.Бадиковтың дүниеден өткеннен кейінгі шыққан басылымдары. Жинақтарда В.Бадиковтың әңгімелері мен оның шығармашылығы туралы сын-мақалалар, естеліктер мен эсселер қамтылған. Жинақтарды құрастырған В.Бадикова мен белгілі жазушы, журналист А.Арцишевский.
Кеш барысында Р.Жугунусованың «Виктор Бадиков. Я считаю себя человеком литературы» атты кинофильмінің тұсауы кесілді. Рита Жугунусова – белгілі қазақстандық телережиссер, сценарийлер мен 50-ге жуық теледидарлық фильмдерінің авторы және продюсері. Тұсаукесерде халықаралық байқаудың лауреаты Лидия Колесникова В.Бадиковтың сөзіне жазылған әндері мен романстарды орындады.
Іс-шарада Виктор Бадиковтың отбасы: Валентина Бадикова, Наталья Белова, Катерина Бадикова, М.Лермонтов атындағы Мемлекеттік академиялық орыс драма театрының бас режиссері Р.Андриасян, белгілі жазушы, журналист А.Арцишевский, ақын, прозаик Д.Нақыпов, Қ.Қабдрахманов, Ү.Тәжікенова, М.Пак, Ю.Егоров, "Простор" журналының редакторы Н.Чернова, Абай атындағы Қазақ ұлттық педагогикалық университетінің профессорлары, кафедра меңгерушілері С.Жунусова, Т.Тебегенов, М.Әуезов атындағы Әдебиет және өнер институтының ғылыми қызметкерлері С.Ананьева, А.Хамраев, қазақстандық ПЕН-клуб мүшелері, әдебиеттанушылар мен кинорежиссерлер өз пікірлерін айтып, естеліктерімен бөлісті.
Шара аясында ҚР Ұлттық кітапханасына, Алматы қаласының кітапханаларына және қонақтарға жаңа басылымдар сыйға тартылды.
|