2012 жылы 14 қарашада сағ. 11.00-де Кітапханатану залында «Жалын» баспасынан «Жас толқын» сериясы аясында жарық көрген Қазақстанның жас ақындарының, журналист-публицистерінің жаңа кітаптарының тұсаукесері өтті.
«Жалын» баспасы «Әдебиеттің әлеуметтік маңызды түрлерін басып шығару» мемлекеттік бағдарламасы аясында «Жас толқын» сериясымен Қазақстанның дарынды жас ақындары мен журналист-публицистерінің 20-дан астам кітаптарын жарыққа шығарды. Бұл жоба ҚР Мәдениет және ақпарат министрлігі Ақпарат және мұрағат комитетінің бастамасы бойынша 2008 жылдан бері шығып келе жатқан «Жас толқын» сериясының жалғасы болып табылады.
Жинақтарға жас ақындар – Бақытгүл Баймолдақызы, Бауыржан Әліқожа, Алмат Исәділ, Мақпал Мыса, Үміт Зұлхарова, Мағиза Құнапияқызы, Ерғали Бақаш, Бақытжан Алдияр, Алтыншапақ Хаутай, Жанат Жаңқашұлы, Олжас Қасым, Мирас Асан, Ержан Жұмабек, Гүлжайна Қалдина, журналист-публицистер: Қанағат Әбілқайыр, Айнұр Шамшейтова, Мирас Мұқашев, Әлібек Байбол, Алмас Нүсіп, Әсем Қоспағаровалардың өлеңдері, прозалары енгізілген.
Тұсаукесерді белгілі жазушы, «Құрмет» орденінің иегері, «Жалын» баспасының директоры Бексұлтан Нұржекеұлы жүргізді.
Іс-шарада Бексұлтан Нұржекеев, Қазақстан Жазушылар одағының төрағасының бірінші орынбасары, Халықаралық «Алаш» әдеби сыйлығының лауреаты, танымал ақын Жайлыбай Ғалым, белгілі ғалым, М.Әуезов атындағы Әдебиет және өнер институтының бөлім меңгерушісі Айгүл Смакова мен жетекші ғылыми қызметкері Гүлжахан Орда, ақын, М.Мақатаев атындағы сыйлығының лауреаты Аманхан Әлім, ақын, Мемлекеттік «Дарын» жастар сыйлығының лауреаты, Қазақстан Жазушылар одағының төрағасының орынбасары Әшімжан Жанарбек, жас сыншы, «Ұлан» газетінің бөлім редакторы Бағашар Тұрсынбайұлы жас ақындар мен журналист-публицистердің кітаптарына талдау жасап, әдеби сын айтып, пікір бөлісіп тілектерін білдірді.
Тұсаукесерге танымал ақын-жазушылары, қоғам қайраткерлері, әдебиеттанушылар, жоғары оқу орындарының студенттері, Алматы қаласының кітапханашылары мен БАҚ өкілдері қатысты.
|