Өнер бөлімінде «Қазақ халқының сал серілері» атты кітап көрмесі ұйымдастырылды.
Сал-сері — дәстүрлі қазақ қоғамында ерекше өнерпаздықпен байланысты ұғым. Ұлттық поэзия тарихында ақындық-әншілік, композиторлық–орындаушылық өнерді аса сәтті тоғыстырған әнші ақындардың, сал-серілердің өрелі өнерпаздық табиғаты айырықша мәнділігімен ерекшеленеді. Сал-серілік өнерді жоғары дәрежеге көтерген әнші, күйші, суырып салма ақындар серілік үрдісті қатаң сақтап, нағыз бесаспап өнер иесі бола білген. Олардың шығармашылығы ғұламалық, қоғамдық-саяси және мәдени жағдайларға байланысты қалыптасып, айқындалған. Бұл орайда халықтың ортасынан суырылып шыққан осындай біртұтас киелі өнердің көрнекті қайраткерлерін - Біржан сал, Ақан сері, Абай, Мұхит, Балуан Шолақ, Жаяу Мұса, Мәди, Үкілі Ыбырай, Құлтума, Сары, Майра, Естай, Нартай, Кенен және т.б. атап өтуге болады. Осы сал-серілер туралы ой өрбіткен М.Әуезовтің, А.Жұбановтың, Ә.Марғұланның, Е.Ысмайыловтың және басқа да зерттеушілердің сүбелі зерттеулері тарихи-әдеби деректерімен, мағыналы толғамдарымен құнды.
Кітап көрмесінде қазақтың сал-серілерінің өмірі, шығармашылығы жайлы мәліметтер және олардың еңбектері, соның ішінде: С.Негимовтың «Қазақтың сал серілері» (2005), А.Жұбановтың «Замана бұлбұлдары» (2001), З.Қоспақовтың «Қазақтың әншілік өнері» (1999), Ақан серінің «Маңмаңгер», Жаяу Мұсаның «Ақ сиса» (1985), «Балуан Шолақ» (1998), Ә. Бектасовтың «Мәди» (1969), М.Құрманғалиеваның «Мұхит» (2003), Ы.Сандыбайдың «Әндер», «Қазақ өнері» энциклопедиясы (2002), «Қазақ музыкасының қысқаша тарихы» (2002) кітаптары және т.б. басылымдар, ноталар мен күйтабақтар, музыкалық дискілер ұсынылған.
Кітап көрмесіне шақырамыз! |
