2012 жылы 29 қарашада сағ.11.00-де Кітапханатану залында белгілі жазушы, драматург, Қазақстан Республикасы Мемлекеттік сыйлығының иегері Дулат Исабековтің 70 жылдығына орай «Атамұра» баспасынан шыққан 7 томдық шығармалар жинағының тұсаукесері өтті.
Тұсаукесерді ҚР Ұлттық кітапхананың Бас директоры Балабекова Гулиса Қабарқызы құттықтау сөзбен ашып, жазушы Дулат Исабековті 70 жылдық мерейтойымен құттықтады.
Іс-шараны белгілі ақын, халықаралық «Алаш» сыйлығының иегері, «Мәдениет қайраткері», «Жас қазақ үні» газетінің бас директоры Қазыбек Иса жүргізді.
Тұсаукесерде «Атамұра» ЖШС-нің Президенті Р.Құл-Мұхаммед, белгілі жазушылар: Қ. Құрманғалиев, Қ.Сегізбай,Ү.Тәжікенова, М.Әуезов атындағы Әдебиет және өнер институтының ғылыми қызметкері А.Қалиева, «Казахстанская правда» газетінің тілшісі Л.Шашкова және т.б. Д.Исабековтың шығармашылығына талдау жасап, 7 томдық жинақ туралы пікірлер айтып, 70 жылдық мерейтойына орай ыстық лебіздерін білдірді.
7 томдық жаңа шығармалар жинағында Д.Исабековтің бұдан бұрын «Өлке» баспасынан жарық көрген 5 томдық кітабына енген повесть, әңгімелері және соңғы кезде жазылған жаңа пьесалары қамтылған. Сонымен бірге жазушының бұрын жарияланбаған аудармалары – Ф.Достоевскийдің «Ақ түндер» романы мен А.П. Чеховтың әңгімелері енгізілді.
Іс шараның аясында ҚР Ұлттық кітапханасының қорынан Д.Исабековтың шығармашылығына арналған «Драматургия тарланы» атты кітап көрмесі ұйымдастырылды.
Қатысушылар: белгілі ақын-жазушылар, қоғам қайраткерлері, әдебиеттанушылар, жоғары оқу орындарының студенттері, оқырмандар, БАҚ өкілдері.
|