12 жылы 21 желтоқсан сағ.15.00-де ҚР Ұлттық кітапханасының Көрмелер залында белгілі театр қайраткері, Қазақстанның халық әртісі, ҚР Мемлекеттік сыйлығының лауреаты Камал Қармысовтың 100 жылдығына орай еске алу кеші өтті.
Кеш Өнер бөлімі жанындағы «Інжу-маржан» клубы аясында ұйымдастырылды.
Камал Қармысов 1912 жылы Алматы облысының, Жамбыл ауданында дүниеге келген. 1929 ж. Ташкенттегі Орта Азия университетінің экономика факультетіне түседі. 1930 ж. Қазақстан Өлкелік комсомол комитеті Кармысовтың өнерге деген бейімділігін байқап, Риддердегі Жұмысшы жастар театрын ұйымдастыруға жібереді. 1931 ж. Қазақтың Мемлекеттік академиялық драма театрының құрамына қабылданып, сахналық жолын сол жылы Т.Жароковтың «Қанды таяқ» спектаклінде Ұрының рөлін ойнаудан бастады. К.Қармысов рөлдің кескін-келбетін, қимыл-қозғалысын дәл тауып, кейіпкерінің ішкі жан-дүниесімен шебер шендестіре білген, сатиралық рөлдердің шебері болған. Сомдаған негізгі кейіпкерлері: Нұрқан (М.Әуезовтің «Түнгі сарын»), Керім (М.Әуезов пен Л.Соболевтің «Абай»), «Қозы, Жантық, Сердәлі (Ғ.Мүсіреповтің «Қозы Көрпеш – Баян сұлу» мен «Ақан сері – Ақтоқты»), Уәли Хасан (Қ.Мұхамеджановтың «Жат елде»), Бөпіш (С.Жүнісовтің «Ажар мен ажал») және т.б. Осы соңғы екі рөлі үшін 1980 жылы Мемлекеттік сыйлығы берілді.
1945 жылдан бастап киноға түсе бастаған: «Абай әні», «Махаббат дастаны», «Дала қызы», «Біздің сүйікті дәрігер» және т.б. КСРО-ның «Құрмет белгісі», Еңбек Қызыл Ту және Халықтар достығы ордендерімен марапатталған.
Кеш аясында Камал Қармысовтың өмірі мен шығармашылығына арналған «Тарлан талант» атты көркемделген кітап көрмесі ұйымдастырылды.
Іс-шараны белгілі театр сыншысы, ҚР еңбек сіңірген өнер қайраткері, профессор Әшірбек Сығай жүргізді.
Кеш барысында Камал Қармысовтың қыздары қыздары Мари Камалқызы, Ақбопе Камалқызы, филология ғылымдарының докторы Көбей Шахметұлы Хұсайын өз естеліктерімен бөлісті.
Кешке Камал Қармысовтың немерелері, кітапхана қызметкерлері және оқырмандар қатысты.
|