«Өнер» бөлімінде «Еңбек әлемі музыка әлемінде» атты күйтабақтар көрме­сі ұйымдастырылды. 

   Адамзат баласы ежелден бері еңбек етіп, тер төгудің ар­қа­сында өсіп–өркендеп келеді. Сонау алғашқы қауымдық құ­рылыс дәуірінен бүгінгі күнге дейінгі адамзат тарихына көз жіберсек, барлық игіліктер мен жетістіктерге тек еңбек ету ар­қы­лы қол жет­кізудің жарқын үлгісін көреміз.  

   Бүгінде әлеуметтік дамудың жаһандық тренді «Жалпыға ортақ еңбек қоғамына» өтуге барып тіреледі. Сондықтан адал еңбекке ынталандырудың жолын табу, еңбек табыстарын қоғамдық ынталан­дыру­дың жүйесін құру - Қазақстандағы әлеуметтік жаңғыртудың аса маңызды мәселелерінің бірі.  

   Елбасының «Жалпыға Ортақ Еңбек Қоғамына қарай 20 қадам» бағдарламасы аясында ҚР Ұлттық кітапханасы «Еңбек әлемі музыка әлемінде» атты күйтабақтар көрмесін дайындады. Бұл көрмеде еңбек адамдарының ерлігі мен еңбегін жырлаған Қазақстан композиторларының әндері мен күйлері жинақталған күйтабақтар оқырмандар назарына ұсынылған.

   Көрмеде халық композиторы Д.Нұрпейісованың «Жеңіс», «Еңбек ері», «Сауыншы» күйлері, композитор Х.Тастановтың «Тыңға аттану» күйі, Ә.Бейсеуовтың «Бағбан-ата», К.Әзірбаевтың «Жайнады тыңым жайнады», композитор К.Дүйсекеевтің «Тың дала» әндері, «Тың туралы әндер»  және т.б. күйтабақтар қойылған.

   Көрме мәдениет және өнер қызметкерлеріне, оқырмандарға арналған.

   Күйтабақтар көрмесіне шақырамыз!