Өнер бөлімінде Қазақстанның халық әртісі Бекен Жылысбаевтың 90 жылдық мерейтойына арналған «Алты алаш алқалаған ән еркесі» атты кітап көрмесі ұйымдастырылды.
Жылысбаев Бекен Бәкенұлы (1923) – әнші (тенор), Қазақстанның халық әртісі. Семей облысы Шұбартау ауданы Бірбет ауылында дүниеге келген. 1951 жылы Алматы мемлекеттік консерваториясын бітірген (қазіргі Құрманғазы атындағы Қазақ ұлттық консерваториясы). 1946-1951 жж. - Қазақ радиосы мен Қазақ филармониясында әнші, 1951 жылдан Алматы консерваториясында оқытушы қызметтерін атқарған. Бекен Жылысбаев кең диапазонды ерекше дауыс иесі. Қазақ халық әндерін, орыс классиктері мен шет ел композиторларының ән-романстарын шебер орындаушылардың бірі. Репертуарында М.Төлебаевтың «Тос мені, тос», «Кестелі орамал», «Мен көрдім ұзын қайың құлағанын», «Қазақстан оттары», Е.Рахмадиевтің «Алматы кеші», «Таң самалы» және т.б. белгілі әндер бар.
КСРО-ның «Ленин», 1-2-ші дәрежелі «Ұлы Отан соғысы» және «Еңбек Даңқы», «Құрмет белгісі», Қазақстан Республикасының «Отан» ордендерімен марапатталған.
Көрмеде ҚР Ұлттық кітапханасы қорынан Б.Жылысбаевтың еңбектері, күйтабақтары және ол туралы әдебиеттер ұсынылған.
Кітап көрмесіне шақырамыз! |