2013 жылы 3 мамыр,  сағ. 15.00-де  Көрмелер  залында  Отан қорғаушылар күні мен Ұлы Жеңіс күніне орай патриоттық сезімге арналған «Елім, жерім - Отаным» атты жас ақындардың поэзия кеші өтті.

   Ұйымдастырушылар:  ҚР Ұлттық кітапханасы, Қазақстан Жазушылар одағы.

   Кештің мақсаты - жас өскелең ұрпақтың бойына адамгершілік, отансүйгіштік қасиеттерді тәрбиелеу, отаншылдық ұстанымдарға баулу.

   Патриоттық сезім мен тәрбие, тұлғаның азаматтық қалыптасуы – қазіргі таңда мемлекет пен қоғамның негізгі мәселелерінің бірі болып табылады. «Адамзаттың бәрін сүй «бауырым» деп» Абай, «Адамның бәрі – өз халқың» деп Шәкәрім бабаларымыз жырлағандай, жас өскелең ұрпақтың бойына адамгершілік, отансүйгіштік, адамсүйгіштік қасиеттерді сіңіру, бейбітшілік пен келісімді, тарихи зерделілік пен рухани сергектікті ұлттық құндылығымыз деп танитын мемлекетшілдік, отаншылдық ұстанымдарға баулу – әр азаматтың парызы болып табылады. Тәуелсіз мемлекетіміздің өткені мен бүгінін танытуға, болашағын бағамдатуға, ұлттық менталитет пен мінез-құлықты, салт-дәстүр мен қазақы ойлау жүйесін сақтауға, жас ұрпақты адамгершілік бастауларымен тәрбиелеуде зиялы қауымның, ақын-жазушылардың еңбегі орасан зор деп білеміз.

   Кешті ақын Ерлан Жүніс жүргізді.

   Кеште Маралтай Райымбекұлы, Ырысбай Дәби, Ерғали Бақаш, Жақсылық Қазымұрат тағы басқа ақындар сөз сөйлеп, еліне, жеріне, отансүйгіштікке, тәуелсіздікке, адамгершілікке арналған жыр-өлеңдерін оқыды.

   Іс-шара аясында ҚР Ұлттық кітапханасының қорынан «Отан үшін, ел үшін» және «Ұлы Жеңіске – ұлағатты құрмет» атты кітап көрмелері ұйымдастырылды.

   Іс-шараға  жас ақындар, жазушылар, жоғары оқу орындарының студенттері,  Алматы  қаласы  кітапханашылары, БАҚ өкілдері қатысты.