2013 жылы 31 мамырда Астана қаласында Назарбаев Орталығында аса көрнекті мемлекет және қоғам қайраткері Фазыл Кәрімұлы Кәрібжановтың туғанына 100 жыл толуына арналған еске алу кеші аясында «Рухы биік нар тұлға» тақырыбында ҚР Ұлттық кітапханасының қорынан көшпелі көркемделген кітап көрмесі ұйымдастырылды.
Ұйымдастырушылар: ҚР Мәдениет және ақпарат министрлігі, ҚР Ұлттық кітапханасы, «Қазақ әуендері» АҚ, Фазыл Кәрібжановтың туыстары.
Фазыл Кәрібжанов қысқа да мағыналы ғұмыр кешіп, бар болғаны 48 жасында дүниеден өтті. Кәрібжановтың өмірбаяны – елдің шежіресі (өмірбаяны). Ол 20-30 жылдардың қиын-қыстау кезеңдерін басынан кешіріп, Ұлы Отан соғысы кезінде тылда, ал соғыстан кейінгі жылдары экономиканы қайта қалпына келтіруге, көпшілікпен бірге тыңды игеруде еңбек етті. Еңбек жолын қатардағы агрономнан бастап Қазақ КСР Жоғарғы Кеңесі Президиумының, КСРО Жоғары Кеңесінің төрағасына дейінгі жоғары қызметтерге көтерілді. Фазыл Кәрімұлы қазақ халқына қызмет етудің аса жоғары үлгісін көрсетті.
«Рухы биік нар тұлға» атты кітап көрмесінде Фазыл Кәрібжановтың өмірі мен қызметіне қатысты әдебиеттер және отбасылық мұрағатынан алынған материалдар қамтылды. Көрмеде 150-ден астам баспалық және мерзімді басылымдар ұсынылды.
Қатысушылар: белгілі академиктер, қоғам қайраткерлері, жазушылар, жоғары оқу орындарының студенттері, Астана қаласының кітапханашылары, БАҚ өкілдері.
|