Өнер бөлімінде Қазақстанның халық әртісі Бәкір Баяхуновтың 80 жылдық мерейтойына арналған «Саз саңлағы» атты кітап көрмесі ұйымдастырылды.
Бәкір Яхияұлы Баяхунов (1933 ж.) – композитор, ұстаз, қоғам қайраткері, Қазақстанның халық әртісі (1990 ж.). Алматы қаласында дүниеге келген. Музыка жазудағы алғашқы қадамын мектеп қабырғасында бастап, өз ынтасымен ноталық жазуларды үйреніп, вокал, хор көркемөнерпаздар үйірмелеріне қатысады. 1960 ж. Алматы мемлекеттік консерваториясын профессор Қ.Қожамияровтың композиция класы бойынша бітіріп, 1960-1963 ж. Мәскеу Мемлекеттік консерваториясында музыкалық білімін шыңдайды. Бәкір Баяхунов композиторлық әлемде алғашқы кәсіби дүнген композиторы ретінде Орталық Азиядағы дүнген диаспорасының өкілі. Дүнген фольклорын жинап зерттеген, сонымен қатар қазақ музыкасын өңдеуде елеулі еңбек етті. Оның негізгі шығармалары: «Күй» симфониясы (1965), «Масанчи рухына» поэмасы (1967), үш пьесасы «Айтыс», «Жайлау», «Бәйге» (1967), № 1-7 (1980-2011) симфониялары және т.б. Композитор қытай музыкасын да өңдеуге қатысып, қытайдың көрнекті композиторы Си Синхайдың «Амангелді» симфониялық поэмасын редакциялап, оркестрге түсірген. Сонымен қатар «Жаңбыр», «Дүнген тойы», «Кедей қыздың ақылдылығы» кинофильмдеріне музыка жазған. Бәкір Баяхунов Композиторлар одағының шығармашылық комиссиясын басқарды, басқарма орынбасары болды. ҚазКСР Жоғарғы кеңесі жанындағы дүнген диаспорасы жөніндегі кеңесшісі (1983), Дүнген мәдени орталығының бірінші төрағасы болды. Көптеген музыкалық-сын, ғылыми мақалалардың авторы.
Қазақстан Республикасы Тәуелсіздігінің 10-жылдығы (2001), 1941-1945 жж. Ұлы Отан соғысындағы Жеңістің 65 жылдығына (2000) медальдарымен, ҚР Президентінің Құрмет грамотасымен (2004) марапатталған. Көрмеде ҚР Ұлттық кітапханасы қорынан Бәкір Баяхунов туралы әдебиеттер, оның шығармалары және күйтабақтары ұсынылған.
Кітап көрмесіне шақырамыз! |