Мерзімді басылымдар бөлімінде «Қазақ әдебиеті» газетінің 80 жылдығына арналған көрме ұйымдастырылды.
«Қазақ әдебиеті» – апталық әдеби, мәдени газет. Қазақстан Жазушылар одағы басқармасының органы ретінде тұңғыш саны 1934 жылдың қаңтарында жарық көрген. Газеттің алғашқы редакторы - жазушы Ғ.Мүсірепов. 80 жыл ішінде бас редакторлардың бірнеше ұрпағы өзгерді. Редакциялық алқа құрамында белгілі қайраткерлер мен журналистер: С.Сейфуллин, И.Жансүгіров, І.Қабылов, А.Мусин, М.Қаратаев, Б.Майлин, С.Мұқанов, А.Тоқмаганбетов, С. Мәуленов, А. Тәжібаев, З. Қабдолов, Ш. Мұртаза және басқалар қызмет жасады. Бүгінгі таңда газеттің бас редакторы - Ж. Шаштайұлы.
1940-1954 ж. газеттің шығуы тоқтап қалып, 1955 жылдың қаңтар айынан бастап қайта шыға бастады.
«Қазақ әдебиеті» ұлтымыздың рухани айнасы, еліміздің әдеби-мәдени өмірін жан-жақты қамтитын басылым. Газет қазақ әдебиетінің жоғары идеялық көркемдік сапасын, көркем өнердің өмірді танытушылық рөлі мен тәрбиелік мәнін арттыру үшін, әдебиет пен өнердің халық өмірімен тығыз байланыста болуына атсалысады. Газет беттерінде қазақ ақын жазушыларының өлең, жыр, дастандары, әңгіме, очерктері, роман, повестерінен үзінділер, байырғы мәдени қазынамыздың ел аузында жүрген асыл үлгілері, көне тарихымызға қатысты деректер мен археологиялық-этнографиялық мұралар, қазақ әдебиетінің өткені мен бүгіні және келешегі жайлы әдеби-сын мақалалар, қоғамдық-саяси, әлеуметтік-мәдени оқиғалар жөнінде публицистік өткір ой-толғаулар, дүние жүзі классиктерінің үздік туындыларынан аудармалар жарияланады.
Сонымен бірге оқу-ағарту, білім, ғылым саласындағы әралуан көкейкесті мәселелерді сөз етеді. Кино, театр, сымбат, қол өнерінің тақырыптарын кеңінен толғап, белгілі әдебиет, өнер қайраткерлерімен сұхбат жүргізіп, олардың жаңа шығарма туындыларын оқырмандарға таныстырып отырады.
Көрмеде газеттің шығу тарихын, құрылуын және дамуын баяндайтын мақалалар ұсынылған. Көрме көпшілік оқырман қауымына және Қазақстанның мерзімді басылымдарының тарихына қызығушыларға арналған. |
