Өнер бөлімінің оқу залында әнші, Қазақстанның халық әртісі Рәбиға Есімжанованың 100 жылдық  мерейтойына арналған «Әсем әні – сахна сәні» атты кітап көрмесі ұйымдастырылды.

 Рәбиға Есімжанова (1914-1986)– әнші,Қазақстанның халық әртісі. Ақмола облысы Қорғалжын ауданында дүниеге келген. 1931 жылы Алматы қаласына келіп, Қазақтың мемлекеттік драма театрына жұмысқа орналасады.  Кейін Семей облыстық музыкалық драма театрына ауысып, Еңлік, Айман (М.Әуезов «Еңлік-Кебек», «Айман-Шолпан» пьесасы), Жібек (Е.Г.Брусиловский «Қыз Жібек» операсы) және  т.б. сахналық бейнелерді сомдады. Кейін Алматыдағы Абай атындағы Опера және балет театрына қабылданып, бұрынғы Кеңес Одағының қалаларына гастрольдік сапарлармен шыға бастады. Рәбиға өзінің орындаушылық шеберлігін ұдайы шыңдай түсіп, халық ақындары мен сазгерлері Біржан сал, Ақан сері, Жаяу Мұсаның әндерін орындады. Сонымен қатар, Қазақстан композиторлары: С.Кәрімбаевтың «Көктем», «Қаракөз», «Ақ ерке», Ә.Еспаевтың «Өзгеге көңілім тоярсың», «Өзің де жігіт қызықсың», Ш.Қалдаяқовтың «Бәрінен де сен сұлу», «Қайдасың» шығармаларын нақышына келтіре орындаған.
   1946-60 жылдары Қазақ радиосының, 1960 жылдан өмірінің соңына дейін «Қазақконцерттің» әншісі болды.
   1958 жылы КСРО-ның «Құрмет белгісі» орденімен марапатталған.

   Көрмеде ҚР Ұлттық кітапханасы қорынан Рәбиға Есімжанованың өмірі мен шығармашылығы жайында әдебиеттер ұсынылған.