2014 жылы 27 наурыз, сағ. 11.00-де Көрмелер залында театр және кино актері, кинорежиссер, Қазақстан және КСРО халық әртісі, Қазақстан және КСРО Мемлекеттік сыйлығының иегері Шәкен Аймановтың 100 жылдық мерейтойына орай өмірі мен қызметіне арналған «Шәкен Айманов» атты ұсыныстық библиографиялық көрсеткішінің тұсаукесері өтті.
Библиографиялық көрсеткішті ҚР Ұлттық кітапханасы дайындады.
Шәкен Аймановтың өмірі мен қызметіне арналған библиографиялық көрсеткіште 1935 жылдан бастап 2014 жылдың ақпан айына дейінгі кезеңде баспа бетінде жарық көрген қазақ және орыс тілдеріндегі әдебиеттер қамтылды. Көрсеткіш ғылым және мәдениет қызметкерлеріне, студенттерге, өнерсүйер қауымға, халық әртісінің өмірімен және өнер жолымен жақынырақ танысқысы келетін көпшілік қауымға арналған.
Тұсаукесер модераторы: Қазақстан Жазушылар Одағының мүшесі, құрметті журналист, қажымұқантанушы Ғ.Тәшімбай.
Іс-шара аясында Ш.Айманов атындағы "Қазақфильм" акционерлік қоғамының бас редакторы, жазушы, журналист Д.Амантай; белгілі ақын, хореограф, мәдениет қайраткері Д.Нақыпов; белгілі кинорежиссер С.Азимов; киноөнертанушы Р.Ғ.Оспанова; Қазақстанның еңбек сіңірген қайраткері, режиссер Ә.Рахимов; Шәкен Аймановтың келіні И.Б.Айманова сөз сөйледі.
Тұсаукесер аясында ҚР Ұлттық кітапханасының қорынан Шәкен Аймановқа арналған «Қазақ өнерінің жұлдызы» атты көркемделген кітап көрмесі ұйымдастырылды.
Тұсаукесерге өнер және қоғам қайраткерлері, жазушылар, жоғары оқу орындарының студенттері, Алматы қаласы кітапханаларының қызметкерлері қатысты.
|