2014 жылы 21 сәуір, сағ. 11.00-де М.О.Әуезов атындағы мұражай-үйінде Қазақстанның халық жазушысы, ақын және драматург Әбділдә Тәжібаевтың 105 жылдығына орай өткізілген кеш шеңберінде ҚР Ұлттық кітапханасы «Сырдан ұшқан сұңқар ақын» атты көшпелі кітап көрмесін ұйымдастырды.
Әбділдә Тәжібаев қатардағы газет редакторынан Қазақстан Жазушылар одағы Басқармасының хатшысына дейінгі қызметтерді атқарды. Жазушының әдеби шығармашылығының негізгі жанры – поэзия және драматургия. Ә.Тәжібаев қазақ ұлттық драматургиясының дамуына көп күш жұмсады. Оның шығармалары жылылығымен және лирикалық қанықтылығымен ерекшеленеді. Оның шығармашылығында аударма қызметі үлкен орын алды. Ол А.С.Пушкин, Г.Гейне, Т.Шевченко, А.Островский өлеңдері мен поэмалары аудармаларының авторы. Жазушының есімі қазақ әдебиеті қайраткерлерінің алдыңғы қатарында тұр. Әдебиет саласына сіңірген еңбегі үшін Ә.Тәжібаев Еңбек Қызыл Ту, «Құрмет Белгісі» ордендерімен, құрмет грамоталарымен марапатталған. «Абай» атындағы Қазақ КСР Мемлекеттік сыйлығының лауреаты.
Көрмеде ҚР Ұлттық кітапханасының қорынан Ә.Тәжібаевтың өмірі мен шығармашылығы туралы материалдар және оның шығармалары ұсынылды.
Кітап көрмесімен кеш қонақтары мен қатысушылар: ақынның туыстары мен жақындары, көрнекті қоғам қайраткерлері, белгілі жазушылар және әдебиеттанушылар танысты.
|