2014 жылғы 23 желтоқсан, сағ. 15.00-де Көрмелер залында белгілі жазушы, Халықаралық Алаш сыйлығының лауреаты Қуандық Түменбайдың алты томдық шығармалар жинағының тұсаукесері өтті.

   Қуандық Түменбай 1955 жылы Қызылорда облысында туған. 1977 ж. С.М.Киров атындағы Қазақ Мемлекеттік университетін (қазіргі әл-Фараби атындағы Қазақ Ұлттық университеті), 1990 ж. М.Горький атындағы Мәскеу әдебиет институтын бітірген. 1990-1998 ж. «Лениншіл жас» (қазіргі «Жас Алаш»), «Жетісу», «Алматы ақшамы» газеттерінде корреспондент, бөлім меңгерушісі, бас редактордың орынбасары, кейін «Жалын», «Жұлдыз» журналдарында бөлім меңгерушісі, «Қазақстан» баспасында бас редактор, Алматы халықаралық кәсіптер институтында оқытушы қызметтерін атқарды.
   «Жүрдек пойыз», «Жігіттің Көктөбесі», «Біздің үйдің солдаттары», «Тұңғиық», «Қой мен қойшы», «Көзбояуы жоқ көріністер» т.б. проза кітаптарының авторы. Қ.Түменбаевтың туындылары араб, орыс, неміс тілдеріне аударылған.
   6 томдық шығармалар жинағы «Айғаным» баспа үйінен жарық көрді. Алты томдыққа «Бекеттегі бейкүнәлар» романы, 15 хикаят, 74 әңгіме мен көптеген көз-бояуы жоқ көріністер циклі топтастырылған. «Көзбояуы жоқ көріністер» - қаламгердің өмірде көзбен көріп, көңіліне түйгендері.
   Көптеген хикаяттары кезінде «Жалын» баспасының жабық бәйгесінде басты жүлделерді жеңіп алса, «Депутат Аяз би» хикаяты «Астана-Бәйтерек» республикалық байқауында бірінші орынды иемденді. Көптеген әңгімелері «Сорос-Қазақстан» проза номинациясы бойынша жүлдегер атанды. 

   Іс шараны жазушы, Ұлттық кітапхананың Бас директоры Әлібек Асқар ашты.
   Тұсаукесерді Алматы қаласының Тілдерді дамыту, мұрағаттар және құжаттама басқармасының бастығы Ахетов Мамай Қаниұлы жүргізді.
   Тұсаукесер рәсімінде Н.Жүсіп, Қ.Сәрсенбай, Ә.Қайырбек, А.Әлім, Ә.Меңдеке, Қ.Қожахмет, М.Райымбек, Ә.Сәрсенбаев, А.Жұмәділда және т.б. қатысып, сөз сөйледі.

   Іс-шара аясында Ұлттық кітапхана қорынан автордың шығармашылығына арналған кітап көрмесі ұйымдастырылды.
   Қатысушылар: белгілі ақын-жазушылар, жоғары оқу орындарының студенттері, Алматы қаласының кітапханашылары, кітапхана оқырмандары, БАҚ өкілдері.