Халықаралық конференцияның мақсаты: Елбасы Н.Назарбаевтың бастамасымен жүзеге асырылған және халқымыздың тарихи-мәдени ұлттық мұрасын жаңғыртуға бағытталған «Мәдени мұра» мемлекеттік бағдарламасының осы кезең ішіндегі нәтижелері мен жетістіктері туралы ой-пікір бөлісу. Интеграциялық үдерістерді тереңдетудің маңызды факторы ретінде түркі әлемі халқының әралуан мәдени, рухани өзара әрекеттестігіндегі бірлікті дамыту, шетелдік қонақтар мен зиялы қауымға «Мәдени мұра» жетістіктерін таныстыру.
   «Мәдени мұра» бағдарламасы шын мәнінде ұлттық тарихи-мәдени мұрамызды түгендеп, қайта жаңғыртуда айрықша үлес қосқан  маңызды жоба болды. Бағдарламаның аясында көптеген маңызы бар тарихи-мәдени және сәулет ескерткіштері зерттеліп, қайта жаңғыртылды, археологиялық қазба жұмыстары  жүргізіліп, жүйеленді. Қазақ халқының тарихы бұрын ғылыми ортаға беймәлім көптеген құнды деректермен толықты. Сондай-ақ, қайталанбас бірегей сериялар аясында Қазақстанның философиясы, тарихы, археологиясы мен этнографиясы, өнері, әлем әдебиеті, т.б. бойынша көптеген  кітаптар жарық көрді.
   Халықаралық конференция аясында «Мәдени мұра» бағдарламасының қол жеткен жетістіктері: тарихи-мәдени нысандар макеттерінің, сирек құжаттар мен жәдігерлер көшірмелерінің көрмелері және «Мәдени мұра» бағдарламасы аясында шыққан кітаптар мен кітап дестелерінің көрмесі ұйымдастырылды.

    Конференцияда «Мәдени мұра» мемлекеттік бағдарламасын жүзеге асыру жөніндегі Қоғамдық кеңестің жауапты хатшысы, ҚР Ұлттық кітапханасының бас директоры Асқар Әлібек Асылбайұлы, Халықаралық Түркі Академиясының президенті, тарих ғылымдарының докторы Қыдырәлі Дархан Қуандықұлы баяндама оқыды.
   Сөз сөйлегендер: К.М.Байпақов, М.Қ.Әбусейітова, Мехмет Куталмыш, Ә.Б.Дербісәлі, Т.К.Чоротегин, Н.Ә.Әлімбай, С.Ф.Мәжитов, Қ.Табеев.