«Қазақстан кітаптары» бөлімінің оқу залында «Бір ел - бір кітап» республикалық  акциясы аясында белгілі қазақ жазушысы, Қазақ КСР Мемлекеттік сыйлығының лауреаты Ілияс Есенберлиннің шығармашылығына арналған  кітап көрмесі ұйымдастырылды.

   Ілияс Есенберлин 1915 жылы 10 қаңтарда Ақмола облысының Атбасар қаласында туылған. 1940 жылы Алматы қаласындағы Қазақ тау-кен және металлургия институтын бітірді. Кеңес әскері қатарында болып, Ұлы  Отан соғысына қатысты (1940-1942). Жарақат  алғаннан  кейін майданнан оралып, Қазақстан Компартиясы Орталық Комитетінің нұсқаушысы болды. 
   Майданда жүргенде де әдебиет І.Есенберлин өмірінің шығармашылық мазмұны болды, ал оның еңбек жолы алуан түрлі. Соғыстан кейінгі алғашқы жылдарда Қазақстан Компартиясы Орталық комитетінің аппаратында, кейіннен Жамбыл атындағы Қазақ мемлекеттік филармониясының директоры, Қазақ саяси баспасының редакторы болып қызмет атқарды, «Қазақфильм» киностудиясының сценарлық-редакциялық алқасының мүшесі; «Жазушы» баспасының директоры болып, Қазақстандағы осы ірі көркем әдебиет баспасының дамуына едәуір жағдай жасады. 1971-1975 жылдары Қазақстан Жазушылар одағының екінші хатшысы қызметтерін атқарды.
   І.Есенберлин өз шығармаларында үлкен қоғамдық маңызға ие мәселелерді көтерді, көптеген шынайы сұрақтарға  жауап табуға ұмтылды. Жазушы өз  кітабының беттерінде де, өмірдегідей  жалған патриоттықпен, ұлттық шектеулермен бітіспес күрес жүргізді.
   2015 жылы республикалық «Бір ел бір кітап» акциясы қазылар алқасының шешімімен  І.Есенберлиннің «Көшпенділер» атты тарихи трилогиясы Қазақстанда қалың оқырман қауымға жыл кітабы болып ұсынылды. Ол биылғы қазақ хандығының 550-жылдығымен тұспа-тұс келіп отыр. 
   1969 жылы «Хан кене» романы, кейін «Көшпенділер» тарихи трилогиясын құраған «Алмас қылыш» (1971) және «Жанталас» (1973) романдары жарық көрді. Роман желісі ХV ғасырдан ХІХ ғасырдың орта шеніне дейінгі қазақ даласында болған оқиғаларды: қазақ халқының қалыптасуы, Жоңғар, Қытай, Қиуа, Бұхара және Ресей империясымен  күрделі қарым-қатынастарын қамтиды.  Өз елінің тарихына жүгінуі өз халқының мүддесімен өмір сүрген жазушының шығармашылық жолының шынайы, логикалық және заңды дамуы болды. Осы трилогияның желісімен «Көшпенділер» кинофильмі  түсірілді (2005).
   КСРО-ның Еңбек қызыл Ту (1971), «Құрмет белгісі» (1975) ордендерімен,  «За боевые заслуги» және «За оборону Ленинграда» медальдарымен марапатталған. Қазақ ССР Мемлекеттік сыйлығының лауреаты (1968). Туған қаласы Атбасарда оның шығармашылығына арналған мұражай ашылып, жазушының тұрған үйіне ескерткіш тақта орнатылған. Қазақстан қалаларындағы мектептерге, көшелерге есімі берілген.

 
   Кітап көрмесінде жазушы Ілияс Есенберлиннің өмірі мен қызметі жайлы материалдар және шығармалары ұсынылған.