2015 жылғы 13 наурыз, сағ. 15.00-де Көрмелер залында ҚР Суретшілер одағының мүшесі, Т.Жүргенов атындағы Қазақ ұлттық өнер академиясының профессоры Әбілқасым Сәрсенбаевтың «Ұлт тұлғасы – Мұстафа Шоқай» және «Мұстафа Шоқай суретші көзімен» атты кітап - альбомдарының тұсаукесер рәсімі өтті.
Шараның мақсаты: Ұлт тарихын ардақтаған осындай жан-жақты ізденістен туындаған шығармашылық арқылы барша қауымды көрнекті тұлғаның ерекшеліктерімен етене таныстыру, көркемдікті дәріптеу, рухани ізгілікті нығайту. Алғашқы кітапта ұлт мүддесіне өмірін арнаған, халқымыздың бірлігі мен еркіндігін мұрат етіп, азаттық үшін күрескен күллі түркі дүниесінің көсемі Мұстафа Шоқайдың сан қырлы өмірі тың деректермен, көркем тілмен баяндалады. «Мұстафа Шоқай суретші көзімен» атты кітап-альбомы ұлы тұлғаның мәңгі идеялары мен саяси қызметін қылқаламның құдіретті күшімен беріп, сол өткен тарихи кезеңдерді көз алдыңызға әкеледі. Суретшінің 2011 жылы Стамбулда «Ұлт тұлғасы – Мұстафа Шоқай», 2013 жылы Парижде «Мұстафа Шоқай жолымен» атты жеке шығармашылық көрмесі мен кітаптардың тұсаукесері табысты өткізілді. Осындай рәсімдер бұған дейін де шығарма авторының туған жері Қызылорда облысының Шиелі ауданында және Алматы қаласында ұйымдастырылып, көпшіліктің ықыласына бөленген.
Іс-шараны ҚР Ұлттық кітапханасының бас директоры, ҚР Мемлекеттік сыйлығының иегері, Қазақстанның еңбек сіңірген қайраткері, жазушы Әлібек Асқар ашты.
Тұсаукесерді Алматы қаласы Тілдерді дамыту, мұрағаттар және құжаттама басқармасының бастығы Мамай Ахетов жүргізді.
Сөз сөйлегендер: А.Ақатаев, А.Жұмаділдаев, М.Нәлібаев, Қ.Түменбай, Б.Байділда, М.Садықов, Ж.Перстенов, М.Тұрғынбаев, Д.Ысқақұлы, А.Аляз.
Іс-шара аясында Ұлттық кітапхана қорынан Мұстафа Шоқайдың өмірі мен еңбектеріне арналған кітап көрмесі ұйымдастырылды. Сондай-ақ, жаңа басылым кітапхана қорына сыйға тартылып, автор қатысушыларға қолтаңбасымен кітаптар таратты.
Қатысушылар: белгілі сүретшілер, ақын-жазушылар, қоғам қайраткерлері, жоғары оқу орындарының студенттері, Ұлттық кітапхананың оқырмандары, БАҚ өкілдері.
|