2015 жылғы 29 қыркүйек, сағ. 15.00-де Көрмелер залында «Алматы – Ислам мәдениетінің астанасы - 2015» бағдарламасы аясында Сирек кездесетін кітаптар мен қолжазбалар қорынан Ислам әлеміндегі ұлы ғалымдар еңбектерінің кітап көрмесі өтті.

   2015 жыл Алматы қаласы – Ислам мәдениетінің астанасы болып белгіленді. Алматы қаласы Қазақстанның ғылыми, мәдени, тарихи, өндірістік және қаржы орталығы,  рухани мәдениеті жоғары дамыған инфрақұрылымы бар ерекше мәртебелі қала ретінде  Еуразиялық құрлықтың орталығы болып табылады. Қала тарихы Жетісу арқылы ұлы сауда жолдарын, әлемдік өркениет пен мәдениетті тоғыстырушы, әсіресе мәдени-рухани құндылықтарымен, салт-дәстүрлерімен, діни наным-сенімдерімен, ғылыми және техникалық жетістіктерімен ерекшеленетін Қытайды Византиямен, Шығысты Батыспен байланыстырушы Ұлы Жібек жолының бойында орналасқан әлем мәдениетінің жаһандану үрдістерінің куәсі екенін баяндайды.
   Көрмеде ҚР Ұлттық кітапханасының қорынан XII-XVIII ғғ. көне қолжазба Құрандар, Сүлеймен Бақырғанидың «Хикметтері» (XVIғ.), шығыс ақындары Низами, Навои, Сағди, Хафиз, Жәми, Физули және т.б. ислам діні бойынша және поэтикалық жанрдағы шағатай, араб және парсы тілдеріндегі қолжазбалары орын алған.
   Көрменің тарихи-мәдени және танымдық маңызы өте зор. Көрме ғалымдар мен зерттеушілерге бұрынырақ ғалымдардың тек шағын тобына ғана қолжетімді болып келген жазба мұралардың баға жетпес раритеттерімен танысуына мүмкіндік береді.

   Іс-шараны Сирек кездесетін кітаптар мен қолжазбалар қызметінің жетекшісі Бекполатова Айқан Құдайбергенқызы ашып, көрме экспонаттарымен таныстырды.

   Сөз сөйлегендер: «Нұр Отан» партиясы Алматы қалалық филиалының бөлім басшысы, «Мирас» Қоғамдық кеңесінің хатшысы Қайым-Мұнар Тәбеев, филология ғылымдарының докторы, профессор Дандай Ысқақұлы, «Төле би» мешітінің Бас имамы Кенжеәлі қажы Мырзабаев, Қазақстан Жазушылар одағы басқармасы төрағасының орынбасары, ақын  Маралтай Райымбекұлы, «Алматы ақшамы» газетінің бас редакторы Қали Сәрсенбай.

   Іс-шараға Алматы қаласының «Нұр Отан» партиясы жанындағы «Мирас» қоғамдық қорының өкілдері, Алматы қаласы мешіттерінің бас имамдары мен дінтанушы-ғалымдар, журналистер, жоғары оқу орындарының студенттері, Алматы қаласының кітапханашылары қатысты.