2015 жылғы 9 қазан, сағ. 11.00-де Көрмелер залында С.Жүсіптің «Ашаршылық ақиқаты. Деректер мен дәйектер» кітабының тұсаукесері өтті.
Кітапты Қызылордалық өлкетанушы, журналист Сағат Жүсіп дайындаған. Автор ХХ ғасырда қазақ жерінде орын алған қос ашаршылықтың (1918-1922 және 1931-1933 ж.) тақырыбына байланысты көп жылдарғы іздеулерінің нәтижесінде әртүрлі дерек көздерінен алынған зерттеулер, мақалалар, әңгімелер, естеліктердің негізінде қомақты жинақты дүниеге әкелген. Қос ашаршылықтың кейбір құпия беттері жан ауыртатын естеліктер мен зерттеулер, құжаттар арқылы және тарихшылар мен ғалым мамандардың салиқалы еңбектері арқылы көрсетілген. С.Жүсіп бірнеше кітаптың авторы, «Азаттық» сыйлығының лауреаты. Оның өлке тақырыбына арналған «Қанішер Гержодтың қолжазбасы», «Қанішер Гержодтың ізімен» атты кітаптары 1917-1919 жылдары кеңестердің Сыр бойы халқын жауыздық жолмен басқаруын суреттейді.
Іс-шараны экономика ғылымдарының кандидаты, «Болат Тайжан» қорының президенті Мұхтар Тайжан жүргізді. Сөз сөйлегендер: М.Қалыбаев, Б.Нәсенов, Ж.Кенебай, Қ.Тасыбеков, С.Керімбай және т.б.
Қатысушылар: автордың оқырмандары, БАҚ өкілдері.
|