2015 жылғы 13 қарашада Көрмелер залында «Орхон» баспа үйі шығарған «Ұлы реформатор – Дэн Сяопин» атты кітаптың тұсаукесері өтті. Қытай Халық Республикасының ұлы реформаторы Дэн Сяопин жайлы кітап тұңғыш рет қазақ тілінде шығып отыр. Кітап Бейжіңдегі «Ұлттар» баспасы және Қазақстандағы Қытай елшілігінің тікелей қолдауымен жарық көрді. Дэн Сяопин бүгінгі Қытай елінің Социалистік мемлекет болып қалыптасуына, әлемдік геосаясаттан өз елінің лайықты орын алуына және экономикасының қарыштап өрлеуіне ұшан-теңіз еңбек сіңірді. Сондай-ақ, ол Аспан асты елін дамыған мемлекеттер қатарына енгізу арқылы қытай ұлтының ұлттық көсеміне һәм әлемдік тұлғаға айналды. Әлемдік деңгейдегі реформаторды қазақ оқырмандары да танып білуі қажет. Сол мақсатта жарық көрген бұл жинақты Қытайдың «Ұлттар» баспасының мамандары қазақ тіліне аударып, кітап болып басылуына ерекше көмек көрсетті. Кітап саясаттанушыларға, ғалымдарға, тарихшыларға, студенттерге және жалпы оқырман қауымға арналған.
Іс-шараны Ұлттық кітапхананың бас директоры, жазушы Әлібек Асқар жүргізді. Сөз сөйлегендер: Қазақстан Республикасындағы Қытай Елшілігінің Бас консулының міндетін атқарушы Мия Хунбо, «Ұлттар» баспасының президенті Иу Бинши, қоғам қайраткері, мәдениеттанушы М.Әуезов, «Орхон» Баспа үйінің редакторы Қ.Әбілқайыр, «Ұлттар» баспасы Қазақ редакциясының төрағасы Б.Тоқтасын, ақын М.Айтхожина, журналист К.Адырбек, саясаттанушы С.Құттықадам және т.б. Қытай елшілігіне «Ерекше алғыс хатты» Қазақстан Жазушылар одағы басқармасы төрағасының кеңесшісі, белгілі жазушы, қоғам қайраткері Б.Шаханов, «Ұлттар» баспасының призиденті Иу Бинши мырзаға «Алғыс хатты» Ұлттық кітапхананың бас директоры, жазушы Әлібек Асқар тапсырды.
Тұсаукесерге белгілі саясаткерлер, зиялы қауым және «Ұлттар» баспасының өкілдері мен Қытай Халық Республикасының Қазақстандағы Елшілігінен арнайы қонақтар қатысты.
|