2015 жылғы 3 желтоқсан, сағат 15.00-де Көрмелер залында Мәдениет және спорт министрлігі Тілдерді дамыту және қоғамдық-саяси жұмыс комитеті Ш.Шаяхметов атындағы Тілдерді дамытудың республикалық үйлестіру-әдістемелік орталығының ұйымдастыруымен «Инновациялық технологияларды пайдалану арқылы фольклорлық кейіпкерлерді біріздендіру» атты республикалық дөңгелек үстел өтті.

   Дөңгелек үстел ҚР Білім және ғылым министрлігі Ғылым комитетінің тапсырысымен  Әлеуметтік және қоғамдық-гуманитарлық ғылымдардың өзекті мәселелері мен пәнаралық зерттеулері нысаны бойынша 2015-2017 жылдарға арналған ғылыми зерттеулерді гранттық қаржыландыру негізінде орындалып жатқан «Инновациялық технологияларды пайдалану арқылы фольклорлық кейіпкерлерді біріздендіру» атты ғылыми жобасының 2015 жылғы нәтижесі бойынша қорытынды шара ретінде өткізілді.
   Жобаның басты мақсаты - халық ауыз әдебиеті кейіпкерлерінің  мәтіндердегі бейнелену барысын, ұлттық колоритін сақтай отырып  қағаз бетіне түсіру, яғни сөзбен салынған бейнені бояумен салынған бейнеге айналдыру.
   Дөңгелек үстелде суретшілердің жоба авторлары тарапынан ұсынылған мәтінді басшылыққа ала отырып, әр мифтік бейненің өзіндік ерекшелігін сақтай келе, халықтың наным-сеніміне, дүниетанымына сәйкес салған суреттері талқыға түсіп, ғаламтор арқылы ашық дауыс беру нәтижесінде алған ұпайлары мен қазылар алқасының берген ұпайларының жиынтық балына сәйкес жеңімпаздар анықталды.
   Қазақ фольклорындағы кейіпкерлерді біріздендіру мақсатында ұйымдастырылып отырған дөңгелек үстелдің жұмысына  фольклортанушы және дінтанушы ғалымдар, суретші – аниматорлар, зиялы қауым өкілдері, балаларға өнім шығаратын барлық ұйымдар  қатысты.
   Дөңгелек үстел қорытындысы бойынша тиісті ұсынымдар әзірленді.

   Кездесуді жазушы, ҚР Ұлттық кітапханасының бас директоры Әлібек Асқар ашып, Ш.Шаяхметов атындағы тілдерді дамытудың республикалық үйлестіру-әдістемелік орталығы директорының орынбасары Бижомарт Қапалбек жүргізді.
   Сөз сөйлегендер: З.Сейітжанов, Н.Намазбеков, П.Әуесбаева, Ш.Шортанбаев және т.б.