2016 жылғы 22 қаңтар, сағат 10.30-да Қазақстан Республикасы Ұлттық кітапханасында «Тәуелсіз Қазақстанға – 25 жыл» тақырыбында кең ауқымды кітап көрмесінің салтанатты ашылуы және Қазақстан Республикасы Ардагерлер кеңесінің ұйымдастыруымен «Тәуелсіздік – ұлттық рухы» атты дөңгелек үстел өтті.

 

   Аталмыш шаралардың мақсаты – тәуелсіздік тұғырының биіктігін жас ұрпақ бойына сіңіру мен оларды отансүйгіштікке, еңбексүйгіштік пен патриоттыққа баулып, бабалар аңсаған тәуелсіздік құндылықтарын қастерлеуге үндеу. Сонымен қатар, кітапхана қорындағы тәуелсіздік тарихы мен осы кезеңдегі әдебиет пен өнер, білім мен мәдениет, еліміздің әлеуметтік-экономикалық даму жолындағы жетістіктер көрініс тапқан әдебиеттерді кеңінен насихаттау.

   13 бөлімді кітап көрмесінде кітапхана қорынан тәуелсіз еліміз дамуының негізгі кезеңдерін баяндайтын қазақ, орыс және шетел тілдеріндегі 3500-ден астам басылым ұсынылған.

    Көрмені ҚР Ұлттық кітапханасының Бас директоры, жазушы Әлібек Асылбайұлы ашты.
   Сөз сөйлегендер: ҚР Парламентінің депутаты Бақытбек Смағұл, ғалым, профессор Дандай Ысқақ, Қазақстан Халқы Ассамблеясынан: «Ирныхас» Осетин мәдени орталығының төрағасы Мамсуров Казбек Владимирович. Айтыскер, ақын Арзыгүл Қайыңбекқызы домбырамен арнау орындады.

   Іс-шараға Қазақстан Республикасы Парламентінің депутаттары, қоғам қайраткерлері, жазушылар мен БАҚ өкілдері, жоғары оқу орындарының студенттері қатысты.