2016 жылғы 3 ақпанда, ҚР Ұлттық кітапханасында «Нұр Отан» партиясы Алматы қалалық филиалының бастамасымен «Ақпаратқа қол жеткізу туралы» заңды түсіндіру жұмысы жүргізілді.
Биылғы жылдың 1-қаңтарынан бастап «Ақпаратқа қол жеткізу туралы» ҚР Заңы қолданысқа енгізілген болатын. Бұл заң қоғаммен тікелей байланыста қызмет атқаратын барлық саланы қамтитын болғандықтан, кітапхана жүйесінің мамандары да білуі тиіс және орындауға міндетті құжаттың бірі болып табылады. Таныстырылым барысында «Нұр Отан» партиясы Бостандық аудандық филиалы Қоғамдық қабылдау бөлімінің кеңесшісі Байғали Әбдіәліұлы заңда атап көрсетілген «Ашық үкімет» қызметі туралы әңгімелеп өтті. Ал, Бостандық аудандық халыққа қызмет көрсету орталығының бас маманы Н. Иманғалиев «Ашық үкімет» қызметін қолдануға қатысты кеңес беріп, кітапханашылар тарапынан қойылған сұрақтарға жауап берді.
Жиынды ҚР Ұлттық кітапханасы бас директорының бірінші орынбасары Бақытжамал Оспанова қорытындылап, «Ақпаратқа қолжетімділік туралы» заңының кітапхана жүйесіне қатысты тұстарына тоқталды.
|