Қазақстан Республикасы Мәдениет және спорт министрінің бұйрығымен Сейдуманов Жанат Тұрарұлы «Қазақстан Республикасының Ұлттық кітапханасы» республикалық мемлекеттік мекемесінің  директоры лауазымына тағайындалды. 
   2016 жылғы 16 мамыр күні Қазақстан Республикасы Ұлттық кітапханасының жаңа директоры Сейдуманов Жанат Тұрарұлын кітапхана ұжымына  ҚР Мәдениет және спорт вице-министрі Ахмедьяров Ғалым Алғиұлы ресми түрде таныстырды. Сейдуманов Жанат Тұрарұлы бұған дейін Қазақстан Республикасының Ұлттық мемлекеттік кітап палатасының директоры лауазымында болды. Асқар Әлібек Асылбайұлы, ұжымның алдында сөйлеген сөзінде, кітапхана ұжымына әрқашан өзара түсіністік, сыйластық пен қолдауға негізделген бірлесіп атқарған жемісті жұмыстар мен жеткен жетістіктер үшін жылы лебізін білдірді. Ол ҚР Ұлттық кітапханасының өзінің дәстүрін сақтай және жалғастыра отырып, әлемдік ақпарат кеңістігінде жеткен жетістіктерін әрі қарай дамыта беретініне сенім білдірді және жаңа басшыға  шығармашылық жетістіктер тіледі.
  ҚР Ұлттық кітапханасының ұжымы Асқар Әлібек Асылбайұлына, еліміздің бас кітапханасының дамуына қосқан баға жетпес үлесі үшін шын жүректен алғыстарын білдіріп, Сейдуманов Жанат Тұрарұлы жаңа қызметте шығармашылық табыстар тіледі.