2016 жылғы 18 тамызда Қазақстан Республикасы Ұлттық кітапханасының аумағында Саяхаттаушы кітаптар кітапханасы немесе Буккроссинг жобасының ашылуы болды.

   Буккроссинг (ағылшын тілінен аударғанда «кітаптың айналыста жүруі») идеясын интернет-технология маманы Рон Хорнбекер 2001 жылы ұсынды. Жарты жылдан кейін оның сайтында  еркіндікке жіберілген кітаптың жолын жалғастырған 300 белсенді пайдаланушы тіркелді. Буккроссинг «өзің оқы да – басқаға бер» қағидасына негізделген қарапайым іс-әрекеттен тұрады. Мақсаты – кітап оқуды дәріптеу, кітап оқуға тарту. Біз өз кітаптарымызды кез-келген ниет білдіруші оқуы үшін осы сөрелерде қалдырамыз. Әрбір адам сөредегі кітапты алып, орнына басқа кітап қалдыруына болады.

   Буккроссинг адамдардың кітапқа және кітап оқуға деген қатынасын өзгертеді. Оның мәні кітаптардың сөрелерде шаң басып жатпай, басты мақсаты – пайда әкелуінде!  Басқаша айтқанда, бұл жанды кітапхана.