Конференцияның мақсаты: Алматының мыңжылдық тарихы жайында зерттеу,  деректер жинау, қаланың тарихи маңызын анықтау және Алматының тарихы тереңде екенін дәлелдеу.
   Конференция ҚР Ұлттық Кітапханасының директоры Жанат Тұрарұлының алғысөзімен басталды. Шара Алматының мыңжылдығына арналған конференция материалдары жинағының тұсаукесер рәсімімен жалғасты. Алқасөзді бастаған Ғылым Академиясының академигі Карл Байпақов «Алматының қала болып қалыптасу уақыты турасында археологиялық, нумизиматиялық және жазба деректері бойынша» тақырыбындағы зерттеуін баяндап берді. Кейін Қырым Алтынбеков, Меруерт Әбусейітова, Уахит Шәлекенов, Клара Хафизова, Арнабай Нұржанов, Нәпіл Базылхан, Факия Шәшиденова, Мұрат Нұрпейісов, Сұлтан Орашев, Билялова Гүлмира және Советхан Ғаббасов сынды ғалымдар сөз сөйлеп, Алматының мыңжылдық тарихын жан-жақты зерттеп, қаланың тамыры тереңде екенін дәлелмен жеткізді. Сөз соңында конференция қатысушылары алып қаланың тарихын археологиялық деректерге сүйене отырып, мың жылдан да ұзарту, мерекеге орай қала көшелеріне тарихи-патриоттық суреттер ілу мен жаңа жобаларды ұсыну мәселелеріне қатысты қарар қабылдады. Сонымен қатар конференция барысында әшекей бұйымдар мен қазақы оюмен көмкерілген киім-кешектер жәрмеңкесі өтті.

   Шараға жоғарғы оқу орнының студенттері мен жас ғалымдар қатысып, Жетісу өңірі жайында мол ақпарат алды.