2016 жылғы 19 қыркүйек, сағат 18.00-де Көрмелер залында Еуразия шығармашылық гильдиясының басшысы, белгілі британ ақыны, драматург, Корольдік өнер қоғамының мүшесі Дэвид Перридің «The grammar of witchcraft» кітабының тұсаукесері өтті.
   Тұсаукесерді Еуразия шығармашылық гильдиясының мүшесі, баспагер Марат Ахмеджанов жүргізді. Кештің арнайы қонақтары ретінде қазақтың күрескер ақыны Мұхтар Шаханов, Алматыдағы Британ консулдығының мәдениет жөніндегі атташесі Джим Баттери және автордың өзі қатысты. Сиқыр мен сақсондықтардың дәстүрін баяндай отырып, автор өз шығармасында рухани әлем мен адамның ой-қалауы туралы мәселені көтереді. Кітап Лондондағы Марат Ахмеджановтың «Hertfordshire Press» баспасынан басылды. Айта кетейік, аталған баспадан М.Шаханов пен Ш.Айтматовтың роман-диалог ретінде  құралған «Құз басындағы аңшының зары» кітабы да басылып шықты.
   Тұсаукесер барысында Еуразия шығармашылық гильдиясының Қырғызстандағы мүшелері шығармашылық топтың құрылуы және атқарылған еңбектері туралы баяндап берді. Кеш соңында ҚР Ұлттық кітапханасы директорының орынбасары А.Х.Юсупова жазушыға І.Есенберлиннің ағылшын тіліндегі «Көшпенділер» трилогиясын тарту етті. Дэвид Перри де туындысын ұсынып, кітапхана қорының молаюына үлес қосты.