«Өнер» бөлімінің оқу залында Алматы қаласының 1000 жылдығына арналған «Алматым - әнім» атты кітап көрмесі ұйымдастырылды.
Алматы – кең көшелі, әсем ғимаратты, сансыз көп демалыс орындары, гүл бақтары мен фонтандары бар шуақты күнді, жайлы, көкке оранған қала. Тянь-Шань көк жасыл жоталарының бөктерінде орналасқан әдемі қаланы «бақ-қала» деп атауы кездейсоқ емес. Көктемде оңтүстік шеттері алма, өрік, шие бақтары гүлге оранғанда қала ертегі сияқты болады. Сәнді жасылға орануы мен таулардың салтанатты көрінісі Алматы қаласын басқа қалалардан ерекшелендіре түседі. Бақтар, тоғайлар, алаңдар, гүлзарлар қаланың сексен мыңнан астам гектар жер көлемін алып жатыр. Алматыда қала қонақтарын қызықтыратын және де жергілікті тұрғындарды көркемдігімен қуантатын, назар аударарлық орындар көп. Алматы Орта Азияның қаржы, экономика және мәдени орталығы болып саналады. Биыл біздің даңқты қаламыздың құрылғанына 1000 жыл. Осы маңызды датаны қазан айында Париж қаласындағы ЮНЕСКО-ның штаб-пәтерінде де атап өтеді. Алматы – еліміздің музыка тарыхының қаласы. Қазақ музыканттарының кәсіби шеберліктері қалыптасты және нығайды, Қазақстан мәдениетінің алтын қорына енген шығармалар пайда болды. Алматы қаласына арнап қалам тербемеген ақын, ән арнамаған композитор кемде-кем. Алматы қаласына арнаған Әсет Бейсеуовтің, Мансұр Сағатовтың, Шәмші Қалдаяқовтың, Ескендір Хасанғалиевтің, Алтынбек Қоразбаевтың, Кеңес Дүйсекеевтің тамаша әндері әлі күнге дейін үлкен сахналарда, радио, теледидарда, халық арасында шырқалып жүр. Өнер бөлімі оқырмандарға ҚР Ұлттық кітапханасының күйтабақтар, кітаптар, ноталар және мерзімдік басылымдар қорынан Алматы қаласы туралы көрме ұсынады.
Құрметті оқырмандар, кітап көрмесіне келіңіздер!
|