2016 жылғы 15 қарашада Нәзира Дәулетова атындағы көрмелер залында Қанат Тасибековтың «Ситуативный казахский т. ІІІ, Словарь» кітабының тұсаукесері өтті.

   Автордың алғашқы екі кітабы «Ситуативный казахский» том І – «Мир казахов» және том ІІ – «Диалоги», жалпы таралымы 32 мың данамен баспадан шығып, қазақстандық бестселлеріне айналды. І Том – «Мир казахов» кітабы «Эксперт Казахстан» интернет-порталының әлеуметтік зерттеуі бойынша Қазақстан халқының ұлттық дүниетанымын көрсететін 100 кітаптың қатарына енген (http://expertonline.kz/a10759/). Автор қазақ тілін үйретудің әдістемесін дамытқан еңбегі үшін «Тіл жанашыры» құрмет белгісімен марапатталған.
   Екінші кітабы – «Диалоги» үшін автор Қазақстан Республикасында азаматтық қоғам орнату жолындағы тұрақтылық пен ұлтаралық ынтымақтастықты нығайтудағы сіңірген еңбегі үшін «Бірлік» алтын медалімен марапатталған.
   - Бұл еңбегімде өз оқырмандарымды күнделікті орысша айтып жүрген, қолданып жүрген әртүрлі сөз тіркестерінің қазақша баламаларымен таныстыруды қолға алып отырмын. Мақсатым -  өз оқырмандарымды қазақ тілінің шексіз бай әлеміне осылай таныстыра берсем, жетектей берсем деген ойым бар, – дейді автор.
   Тұсаукесер кезінде келер жылдан бастап ҚР Ұлттық кітапханасында өз жұмысын бастайтын Қанат Тасибеков жетекшілік ететін «Қазақ тілінің әңгіме-дүкені» клубының жұмыс жоспары талқыланды.
   Іс-шараны «Central Asia Monitor» газетінің журналисті Кенже Татиля және осы кітаптың редакторы Назгүл Қожабек жүргізді. Тұсаукесер екі тілде  жүргізілді.
   Сөз сөйлегендер: М.Қуанышбек, С.Жеңісбек, Р.Минуллин және т.б.
   Қатысушылар: ғалымдар, журналистер, БАҚ өкілдері.