2016 жылғы 24 қарашада Н.Дәулетова атындағы залда Қазақстанның халық әртісі Фарида Шәріпованың 80 жылдығына орай еске алу кеші өтті.
   Іс-шара Ұлттық кітапхананың Өнер бөлімі жанындағы «Інжу-маржан» клубы аясында өткізілді.

   Кеш модераторы профессор, Қазақстанның еңбек сіңірген қайраткері А.Б.Құлбаев болды.
   Кешке Қазақстанның халық әртістері: С.Оразбаев, А.Әшімов, Е.Обаев, Н.Ықтымбаев, Т.Тасыбекова, Р. Машурова, Ғ.Байқошқарова, А.Сейтметов, Ү.Сейтімбетов, Б.Қожа және т.б. сияқты мәдениет және өнер қайраткерлері қатысты.

   Фарида Шәріпова 1936 жылы Қытай Халық Республикасының Шәуешек қаласында дүниеге келген. Қытай киностудиясы түсірген “Хасен-Жәмила” көркем фильмінде басты рөлді орындап, өнерімен танылған ол 1955 жылы атамекені Қазақстанға оралды.
   1959 жылы Құрманғазы атындағы Алматы мемлекеттік консерваториясын бітіріп, М.Әуезов атындағы Қазақ академиялық драма театрына қабылданды.
   Жарты ғасырдан астам уақыт бойы осы театрда үздіксіз өнер көрсетті. Сахнада қазақ және әлем классиктерінің драмалық туындыларында, осы заманғы қойылымдарда басты рөлдерді шеберлікпен орындап, ұлттық театр өнерінің жаңа сапалық биікке көтерілуіне үлкен үлес қосты. М.Әуезовтің «Айман-Шолпан» (Шолпан), «Абай» (Ажар), «Қара қыпшақ Қобыланды» (Қарлыға), «Еңлік-Кебек» (Еңлік), «Карагөз» (Қарагөз), Ғ.Мүсіреповтің «Қозы Көрпеш-Баян сұлу» (Баян), Ә.Нұрпейісовтің «Қан мен тер» (Ақбала), Т.Ахтановтың «Боран» (Жаңыл), Ш.Айтматовтың «Жәмила» (Жәмила), «Ана – Жер-ана» (Толғанай), Софоклдың «Эдип патша» (Иокаста), Еврипидтің «Медея» (Медея), Шекспирдің «Асауға тұсау» (Катарина), Пушкиннің «Шағын трагедия» (донна Анна), Чеховтың «Сүйікті менің ағатайым» (Елена Андреевна) және т.б. спектакльдерде қайталанбас образдарды сомдады.
   Фарида Шәріпова кино саласында да жемісті еңбек етті. Ол әйгілі режиссерлер Шәкен Айманов, Мәжит Бегалин, Сұлтан Қожықов, Әзірбайжан Мәмбетов, Леонид Агранович түсірген көптеген танымал фильмдерде ойнады. Дубляж саласына да көп еңбек сіңірді.
   Еңбек Қызыл Ту, «Парасат» ордендерімен марапатталған.
   Кеш аясында Фарида Шәріпованың өмірі мен шығармашылығына арналған «Сахна шебері – Фарида Шәріпова» атты безендірілген кітап көрмесі ұйымдастырылды.