2016 жылғы 1 желтоқсан күні Республика сарайында ҚР Ұлттық кітапханасының қорынан «1 желтоқсан - Қазақстан Республикасының Тұңғыш Президенті күні» атты көшпелі кітап көрмесі ұйымдастырылды.
Көрменің мақсаты – Қазақстан Республикасының Тұңғыш Президенті Н.Назарбаевтың егеменді, экономикалық тәуелсіз Қазақстанның қалыптасуы мен дамуы кезеңіндегі тарихи рөлін, қазақстандық қоғамды жаңғырту мен қайта құрудағы еңбегін кеңінен ашып көрсету. Көрме – Тәуелсіз Қазақстанның қалыптасу жылдарының ерекше шежіресі. 6 бөлімді көрмеге қазақ, орыс және шет тілдеріндегі 500-ден астам басылым қойылған. Онда Тұңғыш Президенттің өмір жолы, жастық шағы, еңбекке араласқан жылдары, саяси және қоғамдық қызметі қамтылған. Сонымен қатар, Елбасы туралы әлем саясаткерлерінің ой-пікірлері, ақын-жазушылар шығармаларының топтамалары бар. Көрмеде республикалық «Социалистік Қазақстан», «Лениншіл жас», «Казахстанская правда», «Ленинская смена» және облыстық «Индустриальная Караганда», «Орталық Қазақстан», «Темиртауский рабочий», «Социалистическая Караганда», «Металлург», «Советтік Қарағанды» газеттерінде жарияланған Н.Назарбаевтың 1958-1969 жылдардағы алғашқы еңбек жолын қамтитын 20-ға жуық мақалалары ұсынылды. Қатысушылар: ақын-жазушылар, жас ақындар, Алматы қаласының әкімшілігі, жоғарғы оқу орындарының студенттері.
|