2017 жылғы 12 қаңтарда Қазақстан Республикасының Ұлттық кітапханасында Ж.Молдағалиев атындағы облыстық әмбебап ғылыми кітапханасы, Ақжайық, Сырым, Теректі Шыңғырлау, Федоровка аудандары қатысқан онлайн-кездесу өтті.
Онлайн-кездесу Ресей патшасының отарлау саясатына қарсы күрескен атақты батыр, әйгілі шешен Сырым Датұлының 275 жылдығына арналды. Кездесуге қатысқан Орал өңірінің тумасы, Қазақстанның еңбек сіңірген қайраткері, әнші-композитор Донеділ Қажымов – Кіші жүз қазақтары көтерілісінің көрнекті басшысы, өзінің асқан даналығымен, шешендігімен және батырлығымен есте қалған, халықтың рухын оятып, бостандық үшін қаншама жыл арпалысқан, есімі тарихқа өшпестей етіп жазылған Сырым Датұлының өмір жолына тоқталды. Республика көлемінде аталып өтетін Сырым Датұлының туғанына 275 толуына орай өткізілетін іс-шаралардан ғалымдар тарапынан батыр өмірінің соңғы кезеңі туралы тың мәліметтер күтетінін айтып, торқалы тойдың қарсаңында бас қосып отырған онлайн-кездесу қатысушыларына сәттілік тіледі.
|