«Өнер» бөлімінің оқу залында композитор, Қазақстанның халық әртісі, Қазақстан өнеріне еңбек сіңірген қайраткер, Қазақстан мемлекеттік сыйлығының лауреаты, профессор Кенжебек Күмісбековтің (1927-1997) 90 жылдығына арналған «Қазақ музыкасының тарланы» атты кітап көрмесі ұйымдастырылды.

   К. Күмісбеков 1927 жылы 23 қарашада Ақмола облысы Қорғалжын ауданының Құмкөл ауылында дүниеге келген. 1955 жылы Алматы мемлекеттік консерваториясының (қазіргі Құрманғазы атындағы  Қазақ ұлттық консерваториясы) халық аспаптар факультетін (Қ.Д. Мұхитовтың сыныбы бойынша) бітірді, 1965 жылы профессор Е.Г. Брусиловскийдің композиция сыныбы бойынша консерваторияны екінші рет бітірді. Халық музыкасының үлгілерін жете меңгеріп, кәсіби композиторлық техниканы игеруі Күмісбеков шығармашылығының негізгі бағыттарын анықтады. «Ықылас туралы поэма», «Қорқыт туралы аңыз», «Ой толқыны», «Дала сыры», «Фараби сазы», «Шалқыма» сияқты оркестрлік поэмалары композитордың халықтық-эпикалық бағыттағы әуен ерекшелігін көрсетеді.
   1971 жылдан Құрманғазы атындағы Қазақ ұлттық консерваториясында педагогтық қызметпен шұғылданды.
   Қазақстан мемлекеттік сыйлығының иегері (1988). 
   Кітап көрмесінде Ұлттық кітапхананың күйтабақтар, кітаптар, ноталар және мерзімдік басылымдар қорынан Кенжебек Күмісбековтің өмірі мен шығармашылығы туралы материалдар ұсынылған. 

   Кітап көрмесіне келіңіздер!