2017 жылғы 29 қарашада Н.Дәулетова атындағы залда Қазақстанның еңбек сіңірген қайраткері, зерттеуші, «Дәстүр» журналының бас редакторы, ақын Қасымхан Бегмановтың «Дәстүр: кеше, бүгін, ертең» атты этнографиялық төрт томдықтың тұсаукесері өтті. Кітап белгілі ғалым-этнограф Жағда Бабалықұлының туғанына 100 жыл толуына арналған.
Жаһандану дендеген қазіргі таңда ұлттық құндылықтарға айырықша басымдықтар берілуде. Ұлттың ұлт болып сақталуы да ұлттық әдет-ғұрып, салт-дәстүрлерінің қаншалықты сақталуына байланысты. Елбасы Нұрсұлтан Назарбаев өзінің «Болашаққа бағдар: рухани жаңғыру» атты бағдарламалық еңбегінде: «Мен халқымның тағылымы мол тарихы мен ерте заманнан арқауы үзілмеген ұлттық салт-дәстүрлерін алдағы өркендеудің берік діңі ете отырып, әрбір қадамын нық басуын, болашаққа сеніммен бет алуын қалаймын», – деуі де сондықтан. Қасымхан Бегмановтың төрт томдығы жеті жыл бұрын жарық көрген «Этнографпен әңгіме» атты кітаптың жалғасы болып табылады. Кітап ұлттық әдет-ғұрып, салт-дәстүрлері туралы ҚР белгілі тұлғаларымен этнографиялық әңгіме-сұхбатарына негізделген. Кеш модераторы: «Президент и Народ» газетінің бас редакторы, жазушы-журналист, «Традиции и обычаи» Академиясының президенті Марат Тоқашбаев. Төрт томдықтың тұсаукесері рәсіміне белгілі тарихшылар және әдебиеттанушылар, өнер, дін, мәдениет қайраткерлері, ғалым-этнографтар, ақындар, жазушылар, тілшілер қатысты.
|