Ақпан айының 20-ында қиырдағы Монголия елінен Ұлттық кітапханаға 2 мейман келді. Олардың біреуі Ұланбатордағы Ұлттық кітапхана директорының орынбасары Биямсүрен ханым да, екінші қонақ Баян-Өлгей аймақтық орталық кітапханасының директоры қандасымыз Зейнеп Көбейгенқызы апай.

Бұл меймандардың Алматыға ат басын тіреуінің басты себебі аймақтағы қазақ оқырмандарының талап-тілектерін орындау екен.Атап айтқанда біраз жылдардан бері бұрындары қалыптасқан барыс-келіс, алыс-беріс дәстүрлі қатынастары саябырсып қалғандықтан, мұңғыл қазақтары ана тіліндегі кітаптардан қол үзіп қалған болатын. Сол олқылықтың орнын толтыру мақсатымен келген меймандар Алматының баспалары мен кітап дүкендерін аралап қажетті, оқырмандар сұранысына сай келетін кітаптар сатып алды. Олардың жалпы саны 3 мың дана, оған қосымша баспалар мен Ұлттық кітапханадан мың данадай кітап сыйға берілді. Бұл кітаптардың негізі көркем әдебиет. Сондай- ақ тарихи, танымдық әдебиет және түрлі энциклопедиялар мен фотоальбомдар. Ұлттық кітапхананың ұжымы өз әріптестеріне сатып алынған кітаптарды сатып алуға жәрдемдесті. Сол секілді Ұлттық кітапхананың жұмысымен жан-жақты таныстырып, Алматы қаласындағы мәдениет орындарын аралатты. Монғолиядан рухани азық жинай келген меймандар Алматыдан еліне риза көңілмен аттанды.