Мерзімді басылымдардың оқу залында «Абай» әдеби журналының 100 жылдығына арналған көрме ұйымдастырылды.
«Абай» әдеби журналы Семей қаласында 1918 жылдың ақпан-қараша айларында қазақ тілінде араб графикасымен жарық көрді. Бас редакторы Жүсіпбек Аймауытов болды. Ол басылым 900 данамен басылып шыққан. Онда Мұхтар Әуезов, Абай және Мағжан Жұмабаевтың туындылары басылды. Белгісіз авторлардың шығармалары да жарияланды. Шығарма авторлары араб әліпбиін пайдаланды, әртүрлі тақырыптағы маңызды мәселелерді көтерді. Журнал Абайдың шығармаларын насихаттап, онда тарих, мәдениет пен әдебиет, өнер және ғылым, философия туралы мақалалар жарияланып тұрды. 1992 жылдан бастап «Абай» журналы 30 мың дана таралыммен жарық көрді. Абайдың әдеби мұрасын, ұлттық мәдениетімізді насихаттауды, қазақ әдебиетінің тарихындағы «ақтаңдақтарды» зерттеу жұмыстарын қолға алды. Журналдың қазіргі бас редакторы Оспанов Мұратбек. Абай Құнанбаевтың 150 жылдығына дайындыққа және оны өткізуге байланысты Қазақстан Республикасының Министрлер Кабинеті 1994 жылғы 15 маусымда Семей қаласында республикалық әдеби-көркем және фольклорлық-этнографиялық «Абай» журналын құру туралы № 512 Қаулысын қабылдады. Бүгінде «Абай» журналының басты мақсаты - ұлы Абайдың, Шәкәрімнің, Мұхтар Әуезовтің шығармашылық мұраларын насихаттау арқылы ұрпақтар сабақтастығын жалғау және «Абай» мұражайы арасындағы әдеби-ғылыми қарым-қатынасты дамыту. Көрме Қазақстан Республикасы Ұлттық кітапханасының қорындағы материалдарды, мерзімді басылым беттерінде жарияланған танымал жазушылар мен журналистердің мақалаларын ұсынады.
Сіздерді көрмеге шақырамыз! |